Կասեցվել է Տաշիրում գործող պանրի արտադրամասի գործունեությունը

ՀՀ սննդամթերքի անվտանգության տեսչական մարմնի (ՍԱՏՄ) որոշմամբ կասեցվել է Լոռու մարզի Տաշիր քաղաքում գործող «Դումիկյան եղբայրներ» ՍՊԸ-ին պատկանող պանրի արտադրամասի գործունեությունը։

Տեսչական մարմնի իրականացրած ստուգումների ընթացքում արտադրամասում հայտնաբերվել են Մաքսային միության տեխնիկական կանոնակարգի պահանջների մի շարք լրջագույն խախտումներ։

Մասնավորապես, արձանագրվել են հետևյալ թերությունները.

• Լվացարանների բացակայություն. Արտադրամասերը սարքավորված չեն եղել ձեռքերը լվանալու համար նախատեսված հատուկ լվացարաններով։

• Օդափոխության խնդիրներ. Օբյեկտում բացակայել են բնական և մեխանիկական օդափոխության անհրաժեշտ միջոցները։

• Անհամապատասխան մակերևույթներ. Հատակների և պատերի մակերևույթները պատրաստված չեն եղել անջրանցիկ, հեշտ լվացվող ու ախտահանվող նյութերից։

• Առաստաղների և դռների վիճակ. Առաստաղները կառուցված չեն եղել այնպես, որպեսզի կանխվի կեղտի կուտակումը, բորբոսի առաջացումն ու մասնիկների թափվելը, իսկ դռները եղել են անհարթ։

• Հակասանիտարական վիճակ. Սննդամթերքի հետ անմիջական շփման մեջ գտնվող սարքավորումները, գործիքներն ու պարագաները պատշաճ չեն մաքրվել, չեն ախտահանվել և չեն պահվել նորոգ ու բարվոք վիճակում։

ՍԱՏՄ ղեկավարի որոշմամբ սահմանվել է հստակ վերջնաժամկետ՝ արձանագրված բոլոր խախտումները վերացնելու և արտադրամասը սանիտարահիգիենիկ նորմերին համապատասխանեցնելու համար։