Գերմանիայի ԱԳ նախարարը Լավրովի սպառնալիքներն «անհեթեթ քարոզչություն» է անվանել

Գերմանիայի արտաքին գործերի նախարար Յոհան Վադեֆուլը մեկնաբանել է ՌԴ ԱԳ նախարար Սերգեյ Լավրովի վերջին սպառնալիքներն Ուկրաինային ռազմական աջակցություն ցուցաբերող արևմտյան երկրներին՝ դրանք անվանելով «անհեթեթ քարոզչություն»։ Այս մասին նա հայտարարել է օգոստոսի 18-ին Süddeutsche Zeitung-ին տված հարցազրույցում։

«Ուկրաինայի դեմ ձախողված զավթողական պատերազմի՝ Ռուսաստանում ավելի ու ավելի ցավոտ զգացվող տնտեսական և սոցիալական հետևանքների ֆոնին Կրեմլը հուսահատորեն փորձում է սպառնալիքների և ապատեղեկատվության միջոցով ճնշում գործադրել Ուկրաինայի դաշնակիցների վրա», — հայտարարել է Վադեֆուլը։

Նրա խոսքով՝ «նույնիսկ ամենաանհեթեթ քարոզչությունը» չի կարող փոխել այն դիմակայունությունը, որն Ուկրաինան ունի միջազգային աջակցության շնորհիվ՝ ռուսական ագրեսիային դիմակայելու համար։

Վադեֆուլը նաև հավաստիացրել է Կիևին Գերմանիայի աջակցության շարունակականության հարցում։

Անցած շաբաթվա վերջին Ռուսաստանի ԱԳ նախարար Սերգեյ Լավրովը հայտարարել էր, որ Մոսկվան խստացնելու է իր գործողությունները՝ «ոչնչացնելու այն ամենը, ինչը Արևմուտքի կողմից սնուցում է Կիևի ռազմական մեքենան»։

Լավրովի հայտարարությունները Գերմանիայի կառավարության ուշադրության կենտրոնում են հայտնվել նաև Լայպցիգի օդանավակայանում վերջերս տեղի ունեցած միջադեպի ֆոնին։

Օգոստոսի 5-ի գիշերը օդանավակայանում՝ ուկրաինական բեռնատար ինքնաթիռի մոտ, հայտնաբերվել էր անհայտ ծագման անօդաչու թռչող սարք, որը, ըստ հաղորդումների, զինված էր պայթուցիկ նյութով և դետոնատորով։

ԱՄՆ հետախուզության գնահատմամբ՝ այդ անօդաչուն, հավանաբար, կապված է եղել Ռուսաստանի կառավարության հետ։