Ադրբեջանի կողմից հետախուզվող Չադաևը հրաժարական է տվել

Ռուսաստանի տրանսպորտի նախարարի խորհրդական Ալեքսեյ Չադաևը որոշել է հեռանալ զբաղեցրած պաշտոնից այն բանից հետո, երբ Ադրբեջանի իրավապահ մարմինները նրա նկատմամբ հետախուզում են հայտարարել։ Այս մասին Չադաևը գրել է իր Telegram-ալիքում։

«Ես ճիշտ չեմ համարում, երբ որևէ մեկի անձնական փորձագիտական դիրքորոշումը կամ հրապարակային հայտարարություններն անդրադառնում են միջպետական հարաբերությունների վրա և խոչընդոտներ ստեղծում պետությունների համատեղ աշխատանքի համար», — նշել է Չադաևը։

Նախկին խորհրդականն ընդգծել է, որ ինքը «ընդամենը արտահայտել է անձնական փորձագիտական կարծիք»։ Նրա խոսքով՝ ինքը խորապես ներգրավված է անօդաչու թռչող սարքերի, տեխնոլոգիական ինքնիշխանության և դրանց հետ կապված քաղաքական գործընթացների թեմաներում։

Չադաևը նաև նշել է, որ ներկայում Ռուսաստանի տրանսպորտի նախարարությունը զարգացնում է «Հյուսիս-Հարավ» միջազգային տրանսպորտային միջանցքը, որի ծրագիրն իրականացվում է նաև Ադրբեջանի տարածքում։

Նա հայտնել է, որ պաշտոնից հեռանալուց հետո շարունակելու է աշխատել նույն ուղղությամբ։

Հիշեցնենք, որ օգոստոսի 17-ին Ադրբեջանի գլխավոր դատախազությունը հետախուզում էր հայտարարել Ռուսաստանի տրանսպորտի նախարարի խորհրդական Ալեքսեյ Չադաևի, քաղաքական խորհրդատու Սեմյոն Ուրալովի և «Մոսկվա 24» հեռուստաալիքի նախկին հաղորդավար Իվան Կնյազևի նկատմամբ։

Ադրբեջանական կողմը նրանց մեղադրում է ահաբեկչության կոչերի, երկրի տարածքային ամբողջականության խախտման և ազգային ատելություն հրահրելու մեջ։