Թուրքիայի ԱԳՆ-ն խստորեն դատապարտել է Սիրիայում ավիաբազային Իսրայելի հարվածները

Թուրքիայի արտաքին գործերի նախարարությունը խստորեն դատապարտել է Սիրիայի Իդլիբ նահանգում գտնվող Աբու Դուհուր ռազմական ավիաբազային Իսրայելի հասցրած հարվածները և միջազգային հանրությանը կոչ արել արձագանքել Իսրայելի գործողություններին։

«Մենք խստորեն դատապարտում ենք այսօր առավոտյան Սիրիայի Իդլիբ նահանգի գյուղական հատվածում գտնվող Աբու Դուհուր ռազմական ավիաբազային Իսրայելի հասցրած ավիահարվածները։ Իսրայելը շարունակում է իր անխոհեմ հարձակումները՝ հարվածելով Սիրիայի ենթակառուցվածքներին և խախտելով նրա տարածքային ամբողջականությունն ու միասնությունը», — ասվում է Թուրքիայի ԱԳՆ-ի հայտարարության մեջ։

Թուրքիայի արտաքին քաղաքական գերատեսչությունը միջազգային հանրությանը կոչ է արել ավելի վճռական դիրքորոշում որդեգրել՝ Սիրիայի դեմ Իսրայելի գործողությունների սրացումը դադարեցնելու համար։

Անկարան նաև կոչ է արել պատասխանատվության ենթարկել Իսրայելին այն գործողությունների համար, որոնք, Թուրքիայի ԱԳՆ-ի գնահատմամբ, անտեսում են միջազգային իրավունքը։

Ավելի վաղ Syria TV-ն, հղում անելով իր աղբյուրին, հայտնել էր, որ Իսրայելի ռազմաօդային ուժերը մի քանի հարված են հասցրել Սիրիայի հյուսիս-արևմուտքում՝ Իդլիբ նահանգում գտնվող Աբու Դուհուր օդանավակայանին։

Ըստ աղբյուրի՝ հարվածների հետևանքով նյութական վնաս է պատճառվել։ Խաղաղ բնակչության շրջանում զոհերի մասին տեղեկություններ չեն հաղորդվել։

Reuters-ի տվյալներով՝ հարվածների թիրախում են եղել օդանավակայանի թռիչքուղին և պահեստային տարածքները։