Բրյանսկի դպրոցում տեղի ունեցած հրաձգության հետևանքով կան ձերբակալվածներ

Բրյանսկում ձերբակալվել են «Էքսկալիբուր» մասնավոր պահպանության ձեռնարկության տնօրենը։ Ձեռնարկությունը պատասխանատու է թիվ 5 գիմնազիայի անվտանգության համար, որտեղ դեկտեմբերի 7–ին հրաձգություն էր տեղի ունեցել։ Այս մասին հայտնում է ՌԻԱ Նովոստին` հղում անելով իրավապահ մարմիններում իր աղբյուրին։

Հայտնի է, որ ձերբակալվել են նաև դպրոցի կին պահակը, ինչպես նաև մահացած աղջկա հայրը: 

«Ձերբակալվել են «Էքսկալիբուր» ՄՊՁ-ի գլխավոր տնօրեն Սերգեյ Պոդդուբնին և դպրոցի անվտանգության աշխատակցուհի Գալինա Չերտկովան, ինչպես նաև մահացած աղջկա հայրը, որը հրացան էր տարել դպրոց և կրակել համադասարանցիների վրա»- ասել է լրատվամիջոցի զրուցակիցը:

Աղբյուրի խոսքով` ձերբակալությունը տեղի է ունեցել դեկտեմբերի 7–ի, լույս 8–ի գիշերը, քրեական գործի հետաքննությունն իրականացնում է Ռուսաստանի քննչական կոմիտեն։

Հիշեցնենք, որ Բրյանսկի շրջանի ՆԳՆ մամուլի ծառայության տվյալներով` հինգշաբթի օրը ոստիկանությունը հաղորդագրություն է ստացել Բրյանսկի հինգերորդ գիմնազիայում հրաձգության մասին: Աշակերտուհիներից մեկը հրացան է տարել վարժարանի շենք և մի քանի կրակոց արձակել, ինչի հետևանքով տուժել է 5 մարդ: Դրանից հետո աղջիկն ինքնասպան է եղել։ Հայտնել էինք, որ հայ ուսուցչուհին Բրյանսկի դպրոցի հրաձգության ժամանակ իր մարմնով փրկել է երեխաներին։

Վիրավոր համադասարանցիներից մեկը նույնպես մահացել է ստացած վիրավորումից։ Կատարվածի դրդապատճառներն ու հանգամանքները պարզվում են։

Այս պահին հայտնի է երկու զոհի և ևս հինգ վիրավորի մասին։ Հաղորդվում է, որ տեղի ունեցածի կապակցությամբ հարուցվել է քրեական գործ։