Ծնողների շիրիմի մոտ հայտնաբերվել են տղայի մարմինը, հրազեն և նամակ

Օգոստոսի 6-ին՝ ժամը 23:00-ի սահմաններում, ՀՀ ՆԳՆ ոստիկանության քրեական ոստիկանության գլխավոր վարչության Շիրակի մարզային վարչությունը օպերատիվ տվյալներ է ստացել Ջրառատ գյուղի գերեզմանատանը դիակի առկայության մասին։

Օպերատիվ տեղեկությունը հաստատվել է դեպքի վայր ժամանած քրեական ոստիկանների կողմից, որոնց գլխավորել է վարչության պետի ժամանակավոր պաշտոնակատար Արթուր Ֆիշյանը։ Հանրապետական շտապօգնության Գյումրու ենթակայանի բժիշկների հերթապահ խումբը տեղում արձանագրել է տղամարդու մահը։

Քրեական ոստիկանները գերեզմանների մոտ հայտնաբերել են Շիրակի մարզի 70-ամյա բնակիչ Սամվել Ա.-ի դին, որի կողքին եղել է հրազեն։

Իրավիճակի մասին Շիրակի մարզի քրեական ոստիկանությունից հայտնել են ՀՀ Քննչական կոմիտեի Շիրակի մարզային քննչական վարչություն։ Դեպքի վայր է ժամանել քննչական խումբը՝ վարչության պետ Սահակ Մկրտչյանի, նրա տեղակալ Նարեկ Գարեգինյանի և օրվա պատասխանատու հերթապահ քննիչի գլխավորությամբ։

Դեպքի առթիվ նախաձեռնվել է քրեական վարույթ, նշանակվել է դիակի դատաբժշկական փորձաքննություն։ Քննչական կոմիտեից auroranews.am-ին հայտնել են, որ վարույթը նախաձեռնվել է ինքնասպանության հասցնելու և հրազենի ապօրինի շրջանառության հատկանիշներով։

Ֆոտոլրագրող Գագիկ Շամշյանի տեղեկություններով՝ դին գտնվել է մահացածի ծնողների շիրիմների մոտ։ Այնտեղ հայտնաբերվել է նաև նամակ, որում գրված է եղել․ «Ներս չմտնեք, ոչ մի բանի ձեռք չտաք, զանգեք ոստիկանություն 02 համարին»։