Բրյանսկի թիվ 5 գիմնազիայում հրաձգություն կազմակերպած 14-ամյա ութերորդ դասարանցի աղջկան ծաղրել են համադասարանցիները, ինչը կարող էր լինել կատարվածի պատճառներից մեկը: Այս մասին գրում է MASH տելեգրամյան ալիքը։

Ալիքի տվյալներով՝ աղջկան ծաղրել են տարրական դասարաններից, այդ պատճառով էլ նա կրակ է բացել տղաների ուղղությամբ։

Ոստիկանությունը ձերբակալել է աղջկա հորը։ Այս մասին էլ հայտնում է ՏԱՍՍ-ը՝ վկայակոչելով իրավապահ մարմիններին։ Նշվում է, որ տղամարդը գտնվում է հարցաքննության մեջ։ Ուժայինները փորձում են պարզել, թե ինչպես է նրա դստեր մոտ հայտնվել ատրճանակը, արդյոք հայրը սովորեցրել է նրան կրակել։ Քննչական գործողություններ կիրականացվեն նաեւ տղամարդու տանը:

Իսկ Shot-ի տվյալներով՝ նախօրեին տղամարդու ծննդյան օրն է եղել։ Ենթադրաբար, աղջիկը կարող էր օգտվել այս պահից և գաղտնի վերցնել որսորդական հրացանը:

MASH տելեգրամյան ալիքն էլ հայտնում է, որ հարցաքննության են բերել նաև աղջկա մորը: Ընդ որում, հայտնի է դարձել, որ կրակողը երկվորյակ քույր ունի։ Դեպքի պահին վերջինս նույնպես գտնվել է կենսաբանության կաբինետում, սակայն կարողացել է փրկվել։

Ռուսաստանի առողջապահության նախարարը վերահսկել է տուժածներին բժշկական օգնություն ցուցաբերելը։ Բրյանսկի մարզի նահանգապետ Ալեքսանդր Բոգոմազն իր Telegram-ալիքում արձագանքել է հրաձգությանը: Կատարվածը նա սարսափելի ողբերգություն է անվանել։ Բոգոմազի խոսքով՝ 5 վիրավոր երեխաներ տեղափոխվել են մարզային մանկական հիվանդանոց, նրանց անհրաժեշտ օգնություն է ցուցաբերվում:

Բոգոմազը մանրամասնել է, որ դեպքի վայրում աշխատում են օպերատիվ ծառայությունները:

Հիշեցնենք՝ ավելի վաղ հայտնել էինք, որ 8-րդ դասարանցին հրաձգություն է կազմակերպել Բրյանսկի դպրոցում։