ԱՄՆ-ում դատարանը վճռել է Meta-ից բռնագանձել 567 միլիոն դոլար՝ երեխաներին վնաս պատճառելու գործով

Նյու Մեքսիկո նահանգի դատավորը Meta ընկերությանը պարտավորեցրել է ավելի քան 567 մլն դոլար հատկացնել հատուկ հիմնադրամի՝ երեխաներին սոցիալական հարթակներում պատճառված վնասի հետևանքները մեղմելու համար։ Ընկերությունը հայտարարել է, որ համաձայն չէ որոշման հետ և պատրաստվում է այն բողոքարկել։

Նյու Մեքսիկոյի գլխավոր դատախազ Ռաուլ Տորեսը Meta-ի՝ Facebook-ի, Instagram-ի և WhatsApp-ի մայր ընկերության դեմ հայց էր ներկայացրել դեռ 2023 թվականին՝ պնդելով, որ տեխնոլոգիական հսկան պատշաճ կերպով չի պաշտպանել երեխաներին առցանց սպառնալիքներից։

Դատավարության ընթացքում մեղադրող կողմը հայտարարել է, որ Meta-ի ալգորիթմները մեծահասակ օգտատերերին ուղղորդել են դեպի դեռահասների հրապարակած բովանդակություն, իսկ ընկերությունը թաքցրել է երիտասարդների համար հնարավոր ռիսկերի վերաբերյալ ներքին տվյալները։

Դեռ մարտին երդվյալ ատենակալները եզրակացրել էին, որ Meta-ն խախտել է Նյու Մեքսիկոյի՝ անբարեխիղճ բիզնես գործելակերպի դեմ օրենքը՝ սպառողներին մոլորեցնելով երեխաների համար իր հարթակների անվտանգության վերաբերյալ։ Այդ ժամանակ ընկերությանը պարտավորեցրել էին նահանգին 375 մլն դոլարի փոխհատուցում վճարել։

Այժմ դատարանի որոշմամբ նախատեսվում է ստեղծել 567 մլն դոլարի հիմնադրամ։ Գումարի շուրջ երեք քառորդը պետք է ուղղվի հոգեկան առողջության խնդիրների բուժմանն ու համապատասխան ծառայություններին։ Այդ միջոցները նախատեսվում է բաշխել հինգ տարվա ընթացքում։

Մնացած գումարը կուղղվի իրազեկման և կանխարգելման ծրագրերին, մշտադիտարկմանն ու գնահատմանը, ինչպես նաև տարբեր ծառայությունների միջև համագործակցության և ծրագրերի արդյունավետության գնահատման միջոցառումներին։

Meta-ն պարտավոր կլինի նաև տարին երկու անգամ դատարանին հաշվետվություն ներկայացնել սահմանված միջոցառումների իրականացման ընթացքի վերաբերյալ։

«Այսօրվա որոշումը հաղթանակ է յուրաքանչյուր ծնողի համար, որը մտահոգված է իր երեխայի վրա սոցիալական ցանցերի ազդեցությամբ, և յուրաքանչյուր երեխայի համար, որն արժանի է ավելի անվտանգ առցանց միջավայրում մեծանալուն», — հայտարարել է Նյու Մեքսիկոյի գլխավոր դատախազ Ռաուլ Տորեսը։

Meta-ն, իր հերթին, հայտարարել է, որ չի համաձայնում դատարանի որոշման հետ և պատրաստվում է այն բողոքարկել։ Ընկերության խոսքով՝ այն շարունակաբար աշխատում է օգտատերերի անվտանգությունն ապահովելու ուղղությամբ և բացահայտ խոսում է վնասակար բովանդակությունն ու չարամիտ օգտատերերին հայտնաբերելու և հեռացնելու դժվարությունների մասին։