Ստոլտենբերգը` ՆԱՏՕ-ի հնարավոր փլուզման լուրերի մասին

Չնայած Ուկրաինային տանկերի մատակարարման վերաբերյալ տարբեր դիրքորոշումներին՝ ՆԱՏՕ-ի քայքայման վտանգ չկա։ Այս մասին Welt-ին տված հարցազրույցում ասել է ՆԱՏՕ-ի գլխավոր քարտուղար Յենս Ստոլտենբերգ։

Նրա խոսքով՝ ուկրաինական հակամարտության սկզբից ՆԱՏՕ-ում «միասնության աննախադեպ մակարդակ է» եղել։

Ստոլտենբերգը ողջունել է ՆԱՏՕ-ի տարբեր երկրների պատրաստակամությունը՝ հնարավորինս արագ տանկեր մատակարարել Ուկրաինային։ «Իմ ուղերձն այն է, որ դաշնակիցները պետք է ավելի շատ զենք մատակարարեն: Սա շատ անհրաժեշտ է։ Եվ ես ողջունում եմ մարտական ​​տանկերի մատակարարման մասին դաշնակիցների ցանկացած հայտարարություն»,- ասել է նա:

Միևնույն ժամանակ ՆԱՏՕ-ի գլխավոր քարտուղարն ըմբռնումով է մոտեցել Գերմանիայի կանցլեր Օլաֆ Շոլցի սպասողական դիրքորոշմանը: Նրա խոսքով՝ Ռամշտեյնում կայացած համաժողովում որոշում է կայացվել Կիևին մեծ քանակությամբ ծանր սպառազինություն մատակարարել։

«Իհարկե, այս պահին հիմնական ուշադրությունը տանկերի վրա է, բայց երբեմն նաև որոշ ժամանակ է հարկավոր դաշնակիցների հետ գաղտնի խորհրդակցությունների համար», - ասել է Ստոլտենբերգը: ՆԱՏՕ-ի գլխավոր քարտուղարը նշել է, որ Գերմանիան այն դաշնակիցներից է, որն Ուկրաինային է մատակարարել մեծ թվով զինտեխնիկա:

Նախօրեին ՆԱՏՕ-ի գլխավոր քարտուղար Յենս Ստոլտենբերգ պատվավոր մրցանակ է ստացել «ուկրաինացի ժողովրդին մատուցած ծառայությունների, Ուկրաինայի՝ որպես ժողովրդավարական և օրենքի գերակայության պետության առաջխաղացման և ամրապնդման համար»։

Այսօր Ստոլտենբերգը Բեռլինում կհանդիպի Գերմանիայի պաշտպանության նախարար Բորիս Պիստորիուսի հետ՝ Ուկրաինային տանկերի մատակարարման շուրջ քննարկումների համար։

New York Times- ն ավելի վաղ հայտնել էր, որ ռուս-ուկրաինական հակամարտությունը ազդել է ՆԱՏՕ անդամ երկրների համախմբվածության վրա: Ըստ լրագրողների՝ Հյուսիսատլանտյան դաշինքում պառակտում է տեղի ունեցել` Կիևին զենք մատակարարելու պատճառով։