Անչափահասների շրջանում թմրամիջոցների շրջանառության դեպքեր են գրանցվել

2026 թվականի առաջին կիսամյակում անչափահասների շրջանում թմրամիջոցների ապօրինի շրջանառության 2 դեպք է արձանագրվել, նախորդ տարի  նույն ժամանակահատվածում 3 դեպք։ Այս մասին ասուլիսի ժամանակ հայտնել է ՀՀ ՆԳՆ ոստիկանության փոխգնդապետ Գեորգի Խաչատրյանը։

«Նվազում կա, դրական է, բայց մենք, այնուամենայնիվ, մտահոգություն ունենք։ Անկախ նրանից, որ դեպքերի նվազում կա, միևնույնն է, դեպքեր արձանագրվել են։ Նշանակում է՝ դեռ անելիքներ ունենք»,- ասել է Խաչատրյանը։

Անդրադառնալով դպրոցներում և դրանց հարակից տարածքներում թմրամիջոցների շրջանառության վերաբերյալ տեղեկություններին՝ նա հայտնել է, որ սեպտեմբերի 1-ից դպրոցներում տեղեկատվական թերթիկներ են բաժանվելու։

Թերթիկները կտրամադրվեն նաև ծնողներին և երեխաների օրինական ներկայացուցիչներին։ Դրանցում ներկայացված կլինեն տեղեկություններ, որոնք կարող են օգնել հասկանալ՝ երեխան թմրամիջոց օգտագործո՞ւմ է կամ զբաղվո՞ւմ է դրանց իրացմամբ, ինչպես նաև՝ ինչ քայլեր պետք է ձեռնարկել նման դեպքերում։

Նշենք, որ 2026 թվականի առաջին 5 ամիսներին Հայաստանում արձանագրվել է թմրամիջոցների հետ կապված հանցագործության 1313 դեպք, որոնցից 1269-ը վերաբերել է ապօրինի շրջանառությանը։