«Ռուսաստանից Քոչարյանի հարցով ոչ ոք չի զանգահարել, հույս ունեմ՝ չի էլ զանգահարի»․ Ալեն Սիմոնյան

Այս պահի դրությամբ Ռուսաստանից ՀՀ երկրորդ նախագահ Ռոբերտ Քոչարյանի հարցով որևէ զանգ չի եղել։ Այս մասին «Դոժդ» հեռուստաալիքի եթերում հայտարարել է ՀՀ Անվտանգության խորհրդի քարտուղար Ալեն Սիմոնյանը։

«Այս պահի դրությամբ Ռուսաստանից Ռոբերտ Քոչարյանի հարցով ոչ ոք չի զանգահարել, և ես հույս ունեմ, որ ոչ ոք էլ չի զանգահարի, քանի որ դա իմաստ չունի»,- ասել է Սիմոնյանը։

Նրա խոսքով՝ Քոչարյանի և նրա քաղաքական ուժի հռետորաբանությունը հիմնականում համընկնում է Մոսկվայից հնչող հայտարարությունների հետ։

Սիմոնյանը նաև «ծիծաղելի» է անվանել Քոչարյանի և նրա ընտանիքի նկատմամբ իրականացվող խուզարկություններն ու ձերբակալությունները Լևոն Քոչարյանի և վարչապետ Նիկոլ Փաշինյանի՝ ԱԺ-ում տեղի ունեցած բանավեճի հետ կապելու փորձերը։

«Դա անհնար է»,- ասել է նա՝ չհամաձայնելով նաև տեղի ունեցողը քաղաքական հետապնդում որակելու հետ։

Սիմոնյանի խոսքով՝ այն քրեական վարույթները, որոնց շրջանակում գործողություններ են իրականացվում Ռոբերտ Քոչարյանի և նրա ընտանիքի անդամների նկատմամբ, վաղուց են նախաձեռնվել։

Հիշեցնենք՝ օգոստոսի 24-ին ԱԺ-ում Նիկոլ Փաշինյանի և «Հայաստան» խմբակցության պատգամավոր Լևոն Քոչարյանի միջև բանավեճ էր տեղի ունեցել։ Փաշինյանը ԱԺ ամբիոնից հայտարարել էր, որ Քոչարյանը չի կարողանալու իր ունեցվածքը ժառանգաբար փոխանցել երեխաներին և թոռներին։