Երևանում թալանել են «Արարատ գինու և կոնյակի գործարան»-ի տնօրենի Lexus-ն ու «Նելլի Դենտ» ՓԲԸ փոխտնօրենի Toyota-ն
Մայիսի 23-ին անձնական ունեցվածքի գողության դեպքեր են տեղի ունեցել Երևանում: Այդ օրը՝ ժամը 15:15-ի սահմաններում ոստիկանության կենտրոնական բաժին է դիմել Երևանի բնակիչ, 30-ամյա Վահե Վանթյանը և հայտնել, որ նույն օրը՝ ժամը 02:00-ից մինչև 14:00-ն ընկած ժամանակահատվածում անհայտ անձը կամ անձինք Չարենցի փողոցի՝ իրենց շենքի բակում կայանված, իրեն պատկանող Toyota մակնիշի ավտոմեքենայի համարանիշները գողացել են:
Ինչպես հայտնում է shamshyan.com-ը, ահազանգով ժամանել է ոստիկանության կենտրոնական բաժնի օպերատիվ խումբը, սակայն Վ. Վանթյանը հրաժարվել է ահազանգ տալուց հետո հաղորդում տալ: Փաստի առթիվ ոստիկանության կենտրոնական բաժնում նյութեր են նախապատրաստվում:
Կայքի տեղեկություններով՝ Վ. Վանթյանը ոստիկաններին հայտնել է, որ նա աշխատում է «Նելլի Դենտ» ՓԲԸ- ում՝ որպես փոխտնօրեն: Նույն օրը՝ ոստիկանության Քանաքեռ-Զեյթունի բաժին է դիմել Երևանի բնակիչ, 64-ամյա Արմեն Սարգսյանը և հայտնել, որ մայիսի 22-ի ժամը 15:00-ից մինչև մայիսի 23-ի ժամը 08:00-ն ընկած ժամանակահատվածում անհայտ անձը կամ անձինք տեխնիկական միջոցների գործադրմամբ գողացել են իր բնակության վայրի՝ Ազատության պողոտայում կայանված, իրեն պատկանող Lexus մակնիշի ավտոմեքենայի կողային հայելիների ապակիները: Ահազանգով ժամանել է ոստիկանության Քանաքեռ-Զեյթունի բաժնի օպերատիվ խումբը՝ հետաքննական բաժանմունքի հետաքննիչի գլխավորությամբ: Փաստի առթիվ հետաքննական բաժանմունքում նյութեր են նախապատրաստվում: Ա. Սարգսյանը ոստիկաններին հայտնել է, որ ինքը աշխատում է «Արարատ գինու և կոնյակի գործարան»-ում՝ որպես տնօրեն: