Ուկրաինան նոր անօդաչուներ է մշակում՝ ռեակտիվ «Շահեդների» դեմ պայքարելու համար

Ուկրաինան միաժամանակ մի քանի լուծում է մշակում՝ ռեակտիվ «Շահեդ» տեսակի անօդաչու թռչող սարքերի դեմ արդյունավետ պայքարելու համար։ Այդ մասին հայտարարել է Ուկրաինայի զինված ուժերի գլխավոր հրամանատարի տեղակալ Անդրեյ Լեբեդենկոն։

Նրա խոսքով՝ արդեն ստեղծվում են բարելավված անօդաչուներ, որոնք կկարողանան գործել այն բարձրությունների և արագությունների պայմաններում, որտեղ թռչում են ռեակտիվ անօդաչուները։

Լեբեդենկոն նաև նշել է, որ Ռուսաստանը շարունակում է կատարելագործել իր անօդաչուներն ու հրթիռները՝ առաջնահերթությունը տալով դրանց որակին, ոչ թե քանակին։

Նրա խոսքով՝ Ռուսաստանը զարգացնում է նաև նոր «Շահեդ» անօդաչուներ, ինչպես նաև այնպիսի համակարգեր, որոնք կարող են գործել առանց կապի և նավիգացիոն միջոցների։

Բացի այդ, Լեբեդենկոյի խոսքով, Ռուսաստանն ակտիվորեն զարգացնում է նաև ծովային պատերազմին վերաբերող տեխնոլոգիաները՝ փորձելով հասնել Ուկրաինային ծովային անօդաչու սարքերի ոլորտում։