Ռուբեն Վարդանյանի գործով գանգատը ՄԻԵԴ-ում․ իրավաբանը խոսել է սպասվող արդյունքների մասին

Sputnik Արմենիայի հետ զրույցում միջազգային իրավունքի մասնագետ Արա Ղազարյանը անդրադարձել է Ռուբեն Վարդանյանի գործով Մարդու իրավունքների եվրոպական դատարան (ՄԻԵԴ) ներկայացված գանգատին և նշել, թե ինչ ակնկալիքներ կան դատարանից։

Նրա խոսքով՝ ՄԻԵԴ-ից առաջին հերթին սպասվում է, որ կճանաչի Բաքվում անցկացված դատավարության անարդարացիությունը և կարձանագրի ամբողջ գործընթացի խտրական բնույթը։

«Բավական է թեկուզ մեկ դրվագ մատնանշել․ ամբողջ դատավարության ընթացքում մենք չենք տեսել, որ մեղադրյալները նստած լինեն իրենց փաստաբանների կողքին», - ասել է Ղազարյանը։

Ավելի վաղ իրավապաշտպան Սիրանուշ Սահակյանը Ռուբեն Վարդանյանի գործով գանգատ էր ներկայացրել ՄԻԵԴ։

Արա Ղազարյանի գնահատմամբ՝ ՄԻԵԴ-ից ակնկալիքներ ունենալը իրատեսական է, քանի որ դատարանը նախկինում նմանատիպ գործերում ցույց է տվել իր անաչառությունը։

Նա նշել է, որ նման դատավարությունների վիճարկումը կարևոր է, քանի որ չվիճարկելու դեպքում կարող է ընկալվել, որ ընդունվում են դրանց արդյունքները։

«Կարևոր է այս դատավարությունների վիճարկումը, որովհետև առաջին հերթին չվիճարկելը նշանակում է՝ ընդունում ես արդյունքները, և երկրորդ՝ վիճարկում կարևոր է, որ վերացվեն այդ դատական ակտերը», - նշել է Ղազարյանը։

Իրավաբանի խոսքով՝ ՄԻԵԴ-ի հնարավոր որոշումը պետք է դիտարկել ոչ միայն կարճաժամկետ, այլև երկարաժամկետ ազդեցության տեսանկյունից։ Նրա կարծիքով՝ Ադրբեջանի նկատմամբ միջազգային ճնշումը կարող է շարունակել աճել, այդ թվում՝ Եվրոպայի խորհրդի շրջանակում կիրառվող քաղաքական և իրավական մեխանիզմների միջոցով։

Ղազարյանը նշել է, որ նույնիսկ եթե Ադրբեջանը դուրս գա Եվրոպայի խորհրդից, միջազգային պարտավորությունները չեն վերանում։

«Ադրբեջանի վրա ճնշումը շարունակում է մեծանալ, որ նա պետք է ի վերջո իր միջազգային պարտավորությունները կատարի», - ասել է նա։

Հիշեցնենք, որ Ռուբեն Վարդանյանի գործը Բաքվում քննվել է առանձին վարույթով։ 2026 թվականի փետրվարի 17-ին հայտնի դարձավ, որ Ադրբեջանի դատարանը նրան դատապարտել է 20 տարվա ազատազրկման: