Փաշինյանը և Մերցը հեռախոսազրույց են ունեցել

Գերմանիայի կանցլեր Ֆրիդրիխ Մերցը հեռախոսազրույց է ունեցել Հայաստանի վարչապետ Նիկոլ Փաշինյանի հետ, որի ընթացքում կողմերը քննարկել են Ուկրաինայում և Մերձավոր Արևելքում տիրող իրավիճակը, ինչպես նաև Հայաստանի և Ադրբեջանի միջև խաղաղության գործընթացը։ Այս մասին լրագրողներին հայտնել է ԳԴՀ կառավարության պաշտոնական ներկայացուցիչ Շտեֆան Կորնելիուսը։ Փոխանցում է ՏԱՍՍ-ը:

Նա նշել է, որ երկու երկրների ղեկավարները մտքեր են փոխանակել Մերձավոր Արևելքում տիրող ընթացիկ իրավիճակի, Ուկրաինայի հակամարտության, ինչպես նաև Հարավային Կովկասի վրա դրանց ազդեցության վերաբերյալ։ «ԳԴՀ կանցլերը կոչ է արել հետագա քայլեր ձեռնարկել Հայաստանի և Ադրբեջանի միջև խաղաղության գործընթացում և ընդգծել է դրա կարևորությունը տարածաշրջանային կայունության համար», - ասել է Կորնելիուսը։

«Այս համատեքստում երկու կողմերն էլ նշել են ինչպես երկկողմ հարաբերությունների, այնպես էլ Հայաստանի և ԵՄ-ի միջև կապերի ընդլայնման հնարավորությունները», - հավելել է Գերմանիայի կառավարության ներկայացուցիչը։