Գերմանիան թույլատրել է ռուսական տիպի միջուկային վառելիքի արտադրությունը

Գերմանիայի Ստորին Սաքսոնիայի շրջակա միջավայրի նախարարությունը թույլատրել է Լինգեն քաղաքում գտնվող Advanced Nuclear Fuels GmbH (ANF) գործարանի ընդլայնումը՝ ռուսական նախագծով ատոմակայանների համար նախատեսված միջուկային վառելիքային հավաքակազմերի արտադրության նպատակով։

Die Zeit-ի փոխանցմամբ՝ ֆրանսիական Framatome ընկերությանը պատկանող գործարանը կարտադրի վեցանկյուն ձև ունեցող վառելիքային հավաքակազմեր, որոնք նախատեսված են խորհրդային և ռուսական նախագծով կառուցված ՎՎԷՌ (VVER) տիպի միջուկային ռեակտորների համար։ Ի տարբերություն արևմտյան ռեակտորների, որոնք հիմնականում օգտագործում են քառակուսի կառուցվածքով վառելիքային հավաքակազմեր, ՎՎԷՌ ռեակտորները պահանջում են հենց այս տիպի վառելիքը։

Գերմանական կարգավորիչը մի շարք խիստ պայմաններ է սահմանել․ «ՏՎԷԼ»-ի և «Ռոսատոմ»-ի աշխատակիցներին արգելվելու է մուտք գործել գործարանի տարածք, Ռուսաստանից մատակարարվող սարքավորումներն ու ծրագրային ապահովումը պետք է անցնեն անկախ ստուգում և մեկուսացված լինեն գործարանի հիմնական ՏՏ ենթակառուցվածքից, իսկ Ռուսաստանից ստացվող վառելիքային տարրերը՝ որակի վերահսկողություն։

Այս որոշմամբ Լինգենի գործարանը կկարողանա մատակարարել վառելիք խորհրդային և ռուսական նախագծով կառուցված ատոմակայաններին՝ առանց ռուս մասնագետների անմիջական մասնակցության։