15 վիրավոր՝ Ռոտերդամում երկու տրամվայի բախման հետևանքով

Ռոտերդամի Էրազմուս կամրջի վրա երկու տրամվայի բախման ու ռելսերից դուրս գալու հետևանքով 15 մարդ վիրավորվել է, հայտնում են տեղի իշխանությունները։

«Ռոտերդամ-Ռեյնմոնդ» անվտանգության տարածաշրջանային ծառայության տվյալներով՝ դեպքը գրանցվել է առավոտյան ժամը 11:10-ի սահմաններում հայտնի Էրազմուս կամրջի վրա, որն այդ պահից ի վեր փակվել է երթևեկության համար։

Պատահարի վայր են ժամանել հրշեջ, բժշկական և ոստիկանական ծառայությունները, ինչպես նաև բժշկական ավիացիայի ուղղաթիռը։ Պաշտոնական աղբյուրների փոխանցմամբ՝ յոթ քաղաքացի տեղափոխվել է բուժհաստատություն, որոնցից մեկի վիճակը ծանր է։ Մյուս տուժածներին առաջին օգնությունը ցուցաբերվել է տեղում։

Միջադեպի պատճառները պարզվում են ընթացող քննությամբ։

Համացանցում հայտնված տեսանյութում ֆիքսվել է երկու տրամվայների բախման պահը, որտեղ երևում է, թե ինչպես է ընթացող տրամվայը բարձր արագությամբ հարվածում կանգնած վագոնին։

Ռոտերդամում տրամվայային փոխադրումներն իրականացնող «ՌԷՏ» ընկերությունն իր պաշտոնական կայքում տարածած հայտարարության մեջ նշել է. «Մենք տեսել ենք տեսանյութը և խորապես ցնցված ենք։ Մեր մտքերը տուժածների և տրանսպորտում գտնվող ուղևորների հետ են»։

«Մեր ողջ ուշադրությունը կենտրոնացած է տուժածների, ներգրավված աշխատակիցների և ուղևորների վրա»,— ասվում է հայտարարության մեջ՝ հավելելով, որ ընկերությունը «կանի հնարավոր ամեն ինչ պարզելու համար, թե ինչպես կարող էր դա տեղի ունենալ»։