ԱԷՄԳ-ն ակնկալում է առաջիկա շաբաթներին մուտք ստանալ Իրանի միջուկային օբյեկտներ

Ատոմային էներգիայի միջազգային գործակալության գլխավոր տնօրեն Ռաֆայել Գրոսին հայտնել է, որ գործակալությունը հույս ունի առաջիկա շաբաթներին վերականգնել մուտքը Իրանի միջուկային օբյեկտներ։ Այս մասին հայտնում է РИА Новости-ն։ 

Գրոսիի խոսքով՝ Իրանի և ԱՄՆ-ի միջև ստորագրված փոխըմբռնման հուշագիրը նախատեսում է 60-օրյա ժամկետ՝ համապարփակ համաձայնագրի հասնելու համար։ Նա ընդգծել է, որ փաստաթուղթը վերաբերում է ոչ միայն միջուկային ծրագրին, այլև Օրմուզի նեղուցով նավարկության ազատությանը, հրադադարի և տարածքային ամբողջականության հետ կապված հարցերին։

«Եթե այդ ժամկետում հաջողվի հասնել վերջնական համաձայնության, ապա հնարավոր կլինի սկսել գործնական աշխատանքը, որը կներառի նաև Իրանի միջուկային օբյեկտներ մուտքը»,- նշել է Գրոսին։

Հիշեցնենք, որ 2025 թվականի հունիսին ԱՄՆ-ի հարվածներից հետո Իրանը սահմանափակել էր համագործակցությունը ՄԱԳԱՏԷ-ի հետ և հայտարարել, որ կազմակերպության ներկայացուցիչների մուտքի վերաբերյալ բոլոր որոշումները կայացնում է Իրանի Ազգային անվտանգության բարձրագույն խորհուրդը։

Նախորդ տարի Իսրայելի և Իրանի միջև 12-օրյա ռազմական բախումներից հետո տարածաշրջանում լարվածությունը մեծացավ։ Հակամարտությանը միացան նաև ԱՄՆ-ն՝ հարվածներ հասցնելով Իրանի միջուկային օբյեկտներին, ինչից հետո Իրանը պատասխան հրթիռային հարված իրականացրեց Կատարում տեղակայված ամերիկյան ռազմաբազայի ուղղությամբ։ Հետագայում կողմերը համաձայնեցին հրադադարի շուրջ։