Apple-ի և Google-ի հարկումը կարող է թանկ արժենալ Եվրոպայի համար․ Թրամփը սպառնում է Եվրոպային

ԱՄՆ նախագահը սպառնացել է մաքսատուրքեր սահմանել եվրոպական այն պետությունների արտադրանքի նկատմամբ, որոնք թվային ծառայությունների հարկ կկիրառեն ամերիկյան ընկերությունների դեմ:

Դոնալդ Թրամփը նշել է, որ որոշ երկրներ չափազանց մոտ են նման քայլ կատարելուն։ Այդ որոշմանը դիմելու պարագայում տվյալ երկրներից ներկրվող ապրանքների համար կսահմանվի 100 տոկոս մաքսատուրք, ինչն էլ իր հերթին կփոխարինի այդ պետության հետ գործող առևտրային համաձայնագրերին:

Իր հերթին Ֆրանսիայի նախագահ Էմանուել Մակրոնը նախորդ շաբաթ հայտարարություն էր տարածել, որ չի զիջի ճնշումներին և չի չեղարկի թվային հարկը, որը սահմանված է ամերիկյան տեխնոլոգիական հսկաների նկատմամբ:

Նշենք, որ Ֆրանսիայում, Իսպանիայում, ինչպես նաև Իտալիայում գործող խոշոր տեխնոլոգիական ընկերությունների համար թվային ծառայությունների հարկը սահմանված է 3 տոկոս, իսկ Մեծ Բրիտանիայում՝ 2 տոկոս: Այս հարկատեսակը կիրառվում է ամերիկյան այնպիսի հսկա ընկերությունների դեմ, ինչպիսիք են Apple-ը, Google-ը, Meta-ն և Amazon-ը:

Հարկ է հիշեցնել, որ Ամերիկայի Միացյալ Նահանգների և Եվրոպական Միության միջև առևտրային նոր համաձայնագիրը Եվրամիության խորհրդի կողմից պաշտոնական հաստատում է ստացել հունիսի 25-ին: