Ռուսաստանը ծրագրում է ռազմական տեխնիկայի մի մասը Սիրիայից տեղափոխել Լիբիա

Ռուսաստանցիները մտադիր են ռազմական տեխնիկայի մի մասը, որը ներկայումս մնում է Սիրիայում, տեղափոխել աֆրիկյան Լիբիա։ Այս մասին հայտարարել է Ուկրաինայի հետախուզության գլխավոր վարչությունը, տեղեկացնում է «Ուկրաինսկայա պրավդա»-ն։

Սիրիական Տարտուս քաղաքի ռազմածովային բազայում ռուսաստանցիները սպասում են իրենց ռազմանավերին՝ ռազմական տեխնիկան և սպառազինությունը տեղափոխելու համար։

Բազայի տարածքում են գտնվում, մասնավորապես, ՌԴ պաշտպանության նախարարության կողմից վերահսկվող «աֆրիկյան կորպուսի» վարձկանները։

Հունվարի 5-ին սիրիական նավահանգիստ կժամանեն ռուսաստանյան խոշոր դեսանտային «Իվան Գրեն» և «Ալեքսանդր Օտրակովսկի» նավերը, ինչպես նաև «Սպարտա» չորաբեռ նավը. դրանք այժմ Միջերկրական ծովում են՝ դեպի Տարտուս ճանապարհին։

«Օտրակովսկի» նավում է գտնվում ՌԴ ՌԾՈւ դեսանտային նավերի 121-րդ բրիգադի շտաբի պետ, 1-ին կարգի կապիտան Յուրի Դավիթյանը։

Հունվարի 8-ին Տարտուս պետք է ժամանի ևս երկու ռուսաստանյան նավ՝ ունիվերսալ բեռնատար Sparta II նավը և «Իվան Սկոբելև» լցանավը, որոնք այժմ հատում են Ջիբրալթարի նեղուցը։

Ռուսաստանցիները մտադիր են Sparta և Sparta II բեռնատար նավերն օգտագործել Սիրիայից Լիբիա ռազմական տեխնիկան և զենքը տեղափոխելու համար։