ՏԵՍԱՆՅՈՒԹ․ ՀՐԱՏԱՊ․ Թուրքամետ ուժերը Հալեպում են

Իսլամիստներն ու թուրքամետ «Սիրիական ընդդիմության» անդամները հասել են Հալեպ։ Քաղաքի ծայրամասերում մարտեր են ընթանում։

Սիրիայի նախագահ Բաշար Ասադի դեմ հանդես եկող ուժերի հանկարծակի հարձակումն արդեն հասել է երկրի մեծությամբ երկրորդ քաղաք: Թուրք հանրությունը գրում է, որ քաղաքի արևմուտքում գտնվող «Նոր Հալեպ» թաղամասը գտնվում է ընդդիմության լիակատար վերահսկողության տակ, գրավել են բանակի մի քանի ռազմաբազաներ, ապստամբները հրապարակում են սպանված սպաների, գրավված տեխնիկայի և զենքի կադրեր: Այժմ նրանք մոտենում են Շեյխ-Մաքսուդ շրջանին, որտեղ գերակշռում են քրդերը։

Երեկ թուրքամետ «Սիրիայի ազգային բանակի» աղբյուրները հայտնում էին, որ Թուրքիան փաստացի բացել է սահմանը, որպեսզի Սիրիա կարողանան հանգիստ մուտք գործել իսլամիստների տարբեր խմբավորումներ, որոնք կռվելու են Ասադի ուժերի դեմ (թեև արևմտյան ԶԼՄ-ներին թուրք պաշտոնյաներն ասում են, որ չեն աջակցում էսկալացիային)։ Նրանց թվում են Կենտրոնական Ասիայի մեծ թվով ներկայացուցիչներ, օրինակ՝ Ուզբեկստանից մարտիկներ։ Սիրիայի բանակը հատուկ նշանակության էլիտար ուժեր է տեղափոխել քաղաք։

Հարձակվողների հիմնական ուժերը կազմում են ՌԴ-ում արգելված «Հայաթ Թահրիր աշ-Շամ»-ի մարտիկները. նրանք 400 քառակուսի կիլոմետր տարածք են գրավել Իդլիբ և Հալեպ նահանգներում: ՌԴ-ն ավիահարվածներ է հասցնում «Հայաթ Թահրիր աշ-Շամ»-ի ահաբեկիչների դիրքերին, սակայն, թուրքամետ հանրության պնդմամբ, մասամբ ծանր զինտեխնիկան հեռացնում է Հալեպից՝ դրա կորուստը թույլ չտալու համար։ Արևմտյան ԶԼՄ-ները նշում են, որ իսլամիստների և ընդդիմության հաջողության մի մասը կայանում է Իսրայելի հետ հակամարտության ընթացքում Լիբանանում «Հեզբոլլահի» ծանր կորուստների մեջ։ Նշվում է, որ Սիրիայում նրանք կռվել են Ասադի կողմից:

Սիրիական ԶԼՄ-ները պնդում են, որ երկրի բանակի որոշ մարտիկների մոտ պայթել են հաղորդակցության միջոցներ (փեյջերներ և հեռահաղորդիչներ) Հալեպի վրա թուրքամետ ուժերի և իսլամիստների հարձակման ֆոնին: