Հայտնի է` որ կողմի նախաձեռնությամբ է տեղի ունեցել Ռուբիոյի և Լավրովի հանդիպումը

Լավրովի և Ռուբիոյի հանդիպման նախաձեռնողը եղել է ամերիկյան կողմը, լրագրողներին հայտնել է դիվանագիտական աղբյուրը: Այս մասին հայտնում է ria.ru-ն:

Նա պարզաբանել է, որ մեկնարկած հանդիպման ընդունող կողմը ԱՄՆ-ն է, նրանք են այս հանդիպման նախաձեռնողները:

ԶԼՄ-ների աշխատանքի արարողակարգի համաձայն՝ ՌԴ-ից և ԱՄՆ-ից լրագրողների երկու խումբ՝ յուրաքանչյուր կողմից 10-ական մարդ, ներս են թողնվել բանակցությունների սենյակ, երբ Լավրովն ու Ռուբիոն արդեն նստած էին սեղանի շուրջ: ԶԼՄ ներկայացուցիչներին թույլատրվել է նկարահանել հանդիպման առաջին կադրերը:

Ամերիկացի լրագրողները սկսել են հարցեր բղավել: Մասնավորապես, լրագրողներից մեկը հարցրել է Ռուբիոյին, թե արդյոք նա հանդիպման ընթացքում Լավրովին կհարցնի, թե արդյոք Ռուսաստանն օգնում է Իրանին թիրախավորման հարցում: ԱՄՆ պետքարտուղարը լռել է:

Ընդ որում, հենց ամերիկացիների կանոններով հարցեր տալն արգելված էր:

10-15 վայրկյան անց լրագրողները լքել են բանակցությունների սենյակը, որից հետո Լավրովն ու Ռուբիոն անցել են բանակցություններին:

Ռուսական կողմից բանակցություններին մասնակցում են ՌԴ ԱԳՆ փոխնախարար Անդրեյ Ռուդենկոն, Արտաքին քաղաքականության պլանավորման դեպարտամենտի տնօրեն Ալեքսեյ Դրոբինինը և ԱՍԵԱՆ-ում ՌԴ նախագահի մշտական ներկայացուցիչ Եվգենի Զագայնովը:

Ամերիկյան կողմից՝ քաղաքական հարցերով ԱՄՆ պետքարտուղարի տեղակալ Էլիսոն Հուկերը, ԱՄՆ նախագահի հատուկ բանագնաց Սերջիո Գորը: