Զինծառայողի մահվան գործով կրտսեր սերժանտի և շարքայինի նկատմամբ կալանք կիրառելու միջնորդություն է ներկայացվել

Հուլիսի 21-ին ՊՆ N զորամասի զինծառայող Ն.Թ.-ի մահվան դեպքի առթիվ նախաձեռնված քրեական վարույթի նախաքննության ընթացքում վերջինիս համածառայակից կրտսեր սերժանտի նկատմամբ հարուցվել է հանրային քրեական հետապնդում՝ Քրեական օրենսգրքի 522-րդ հոդվածի 2-րդ մասի 1-ին, 2-րդ և 3-րդ կետերով, իսկ շարքային զինծառայողի նկատմամբ՝ 522-րդ հոդվածի 2-րդ մասի 1-ին և 3-րդ կետերով (զինծառայողին անզգուշությամբ ինքնասպանության հասցնելը):            

                                                                     

Վարույթի շրջանակում վերջիններս ձերբակալվել են և նրանց նկատմամբ կալանքը որպես խափանման միջոց կիրառելու վերաբերյալ միջնորդություն է ներկայացվել դատարան:

Ավելի վաղ ArmLur.am-ը տեղեկացրել էր, որ Ն. Թ.-ի  մահվան դեպքով, որի նախնական վարկածով՝ նա ինքնասպանություն է գործել, երկու զինծառայող է ձերբակալվել, և նրանց նկատմամբ հարուցվել է հանրային քրեական հետապնդում։

Կայքի տեղեկություններով՝ նախնական վարկածներից մեկի համաձայն՝ զինծառայողին կարող էին հասցրած լինել ինքնասպանության։ Ըստ այդ տեղեկությունների՝ դեպքից առաջ նրան ենթադրաբար ծեծի են ենթարկել, ինչից հետո նա գնացել է ինքնասպանության։

Նախնական տվյալներով՝ Ն. Թ.-ն առաջին անգամ էր բարձրացել մարտական դիրքեր։