Մեծ Բրիտանիան Ուկրաինային կմատակարարի ճշգրիտ կառավարվող Brimstone հրթիռներ

Մեծ Բրիտանիան Ուկրաինային լրացուցիչ կմատակարարի 90 ճշգրիտ կառավարվող Brimstone հրթիռ, 10 AS-90 ինքնագնաց հրետանային միավոր և քառորդ միլիոն զինամթերք: Այս մասին հայտարարել է Միացյալ Թագավորության պաշտպանության նոր նախարար Ջոն Հելին՝ Օդեսա կատարած այցի ժամանակ։

Կիևի իշխանություններին ռազմական օգնության հաջորդ փաթեթը ներառում է նաև 50 փոքր նավ, 40 ականազերծման մեքենա, 61 բուլդոզեր՝ պաշտպանական դիրքերն ուժեղացնելու համար և նախկինում մատակարարված AS-90-ների պահեստամասերը։

«Իշխանափոխություն եղավ, բայց Մեծ Բրիտանիայի առաջատար կուսակցությունները միասնական են Ուկրաինայում տիրող իրավիճակի հարցում: Որպես պաշտպանության նախարար՝ ես կապահովեմ, որ մենք ուժեղացնենք Միացյալ Թագավորության աջակցությունը՝ ավելացնելով հիմնական ռազմական օգնության մատակարարումը», - ասել է Հելին, ով նշանակվել է հուլիսի 5-ին խորհրդարանական ընտրություններում Քիր Սթարմերի գլխավորած Լեյբորիստական ​​կուսակցության հաղթանակից հետո: