Թուրքական «Madame Coco»-ն ամբողջությամբ հեռանում է Ռուսաստանից․ կփակվի 29 խանութ

Կենցաղային ապրանքների ու տեքստիլի թուրքական «Madame Coco» ապրանքանիշը լիովին դադարեցնում է գործունեությունը Ռուսաստանի Դաշնությունում։ Այս մասին տեղեկացրել է էլեկտրոնային առևտրի շուկայի մասնակիցների ասոցիացիայի փորձագետ Նատալյա Քերմեդչիևան։

Փորձագետի փոխանցմամբ՝ ընկերությունը ռուսաստանյան շուկա էր մուտք գործել 2023 թվականի փետրվարին և երկու տարվա ընթացքում խանութներ հիմնել Մոսկվայի, Եկատերինբուրգի, Կազանի, Գրոզնիի, ինչպես նաև այլ քաղաքների խոշոր առևտրային կենտրոններում։ 2025 թվականի սկզբին ապրանքանիշը հայտնել էր հետագա ընդլայնման մտադրությունների մասին։

Քերմեդչիևան ընդգծել է, որ սա ոչ թե առանձին վաճառքի կետերի փակում է կամ աշխատանքի ժամանակավոր դադար, այլ ընկերության ամբողջական հեռացում ռուսական շուկայից։ «Madame Coco»-ն Ռուսաստանում ուներ 29 գործող խանութ։

Գործունեության դադարեցման հիմնական պատճառներն են հաճախորդների հոսքի ու պահանջարկի անկումը, վարձակալության բարձր արժեքը, ինչպես նաև վաճառքների նվազումը փոխհատուցելու անհնարինությունը, ինչի հետևանքով, ամենայն հավանականությամբ, ընկերությունը հայտնվել է սնանկացման եզրին։