Նավրոցկուն «ցնցում է» այն փաստը, որ Լեհաստանն իր գոյությամբ պարտական է ԽՍՀՄ-ին. Զախարովա

ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Լեհաստանի նախագահ Կարոլ Նավրոցկին տառապում է «կլինիկական ռուսատյացությամբ»։

Զախարովան այսպես է արձագանքել Նավրոցկու՝ իր կողմնակիցների հանրահավաքում արած հայտարարությանը, թե «որտեղ ծեծում են մոսկալին, այնտեղ Լեհաստանն օգնում է», և որ «ուկրաինացիները պետք է Ռուսաստանին հեռու պահեն Լեհաստանից»։

ՌԴ ԱԳՆ ներկայացուցիչը նշել է, որ Լեհաստանի նախագահը պարբերաբար ատելության լեզու է օգտագործում, իսկ ռուսների նկատմամբ նվաստացուցիչ «մոսկալ» բառի գործածումը նորմա է դարձել լեհական վերնախավի համար։

Նրա խոսքով՝ Նավրոցկին նաև մոռացել է Ռուսաստանի և Լեհաստանի անմիջական սահմանի մասին։

«Մեր միջև Ուկրաինա և ուկրաինացիներ չկան։ Նախկինում դա փոխշահավետ համագործակցության սահման էր, որից նավրոցկիների և սիկորսկիների ջանքերով ոչինչ չի մնացել»,- հայտարարել է Զախարովան։

Նա Նավրոցկու՝ Ուկրաինային Ռուսաստանի դեմ պայքարում աջակցելու վերաբերյալ հայտարարությունները որակել է պատմական բարդույթների և «անզոր զայրույթի» հետևանք։