Իրանում հայտարարել են, որ խոցված ԱԹՍ-ներն արձակվել էին երկրի ներսից
Իրանի կիբեռտարածության ազգային կենտրոնի մամուլի խոսնակ Հոսեյն Դալիրիանը հայտնել է, անօդաչու թռչող սարքերը, որոնք խոցվել են իրանական հակաօդային պաշտպանության համակարգերի կողմից Սպահան քաղաքի երկնքում, արձակվել են Իսլամական Հանրապետության տարածքից։ Այս մասին նա գրել է X սոցիալական հարթակում:
«Մինչ այս պահը չի եղել որևէ օդային հարձակում Սպահանի կամ երկրի այլ հատվածների ուղղությամբ, որն իրականցված լինի երկրի սահմաններից դուրս գտնվող տարածքից։ Նրանք միայն ձախողված և նվաստացուցիչ փորձ են արել՝ երկինք հանելու կվադրոկոպտերներ, և դրանք նույնպես խոցվել են», գրել է նա։
Մեկնաբանելով ամերիկյան լրատվամիջոցների տարածած տեղեկություններն Իսրայելի հարձակման մասին, Դալիրիանը ասել է, որ դրանք չեն համապատասխանում իրականությանը։
«Թվում է, թե ամերիկյան ԶԼՄ-ները երազում են, որ Իսրայելը հարձակվի Իրանի վրա։ Այլապես, ձախողված հարձակումը մի քանի կվադրոկոպտերներով, որն ավարտվեց մի քանի փոքրիկ թռչուններ սպանելով, աշխարհում ոչ մի տեղ հարձակում չի համարվում», - գրել է նա։
