Առերևույթ սա գրանդիոզ կոռուպցիոն սխեմա կարող է լինել. Արթուր Խաչատրյան
Հայաստանում ներկայում տարբեր ոլորտներում աշխատող հազարավոր հնդիկների հարցում կարող է ոչ միայն կոռուպցիոն, այլև թրաֆիքինգային սխեմա գործել։ Այսօր ԱԺ-ում կառավարության հետ հարցուպատասխանի ժամանակ ասաց «Հայաստան» խմբակցության պատգամավոր Արթուր Խաչատրյանը։ ՊԵԿ-ից՝ իր հարցմանը ստացված պատասխանի համաձայն՝ Հնդկաստանից Հայաստան 2023թ․ ներգնա աշխատանքի է եկել 1106 քաղաքացի, մինչդեռ միգրացիոն ծառայության տրամադրած տվյալների համաձայն՝ 2023-ին Հնդկաստանից Հայաստան է ժամանել ավելի քան 25 հազար մարդ։
«Սկուտեր քշողներն առնվազն էդ 1106-ից մի 10-ն անգամ ավելի են, շինարարությունում ինչքան են աշխատում, էդ մարդիկ Հայասստանում գրանցված չեն, հարկ չեն վճարում, առերևույթ սա գրանդիոզ կոռուպցիոն սխեմա կարող է լինել, գրանդիոզ թրաֆիքինգային սխեմա կարող է լինել»,- ասաց Արթուր Խաչատրյանը։
Նրա խոսքով՝ Հնդկաստանում մարդկանց հավաքագրում են, գալիս են Հայաստան, Հայաստանում նրանց աշխատանքով են ապահովում՝ առանց մի լումա հարկ վճարելու։
Նա հարց հնչեցրեց՝ եթե կառավարությունը ջանասիրաբար ուզում է հարկել արտագնա աշխատանքի մեկնած ՀՀ քաղաքացիներին, ինչո՞ւ նույն ջանասիրությունը գործի չի դնում Հայաստան խոպան եկածների նկատմամբ։
«Առերևույթ սա խոշոր ընդհատակյա բիզնես է»,- ասաց Խաչատրյանը։
20–30 հազար հնդիկ աշխատանքային միգրանտ կա ՀՀ–ում. զբոսաշրջիկներ քիչ են գալիս. Քերոբյան
ՀՀ վարչապետ Նիկոլ Փաշինյանը բարձրացված հարցը լեգիտիմ համարեց, նշեց՝ ամեն ինչ պետք է արվի այդ մարդկանց հարկային դաշտ բերելու համար։ Արթուր Խաչատրյանը շարունակեց իր հարցադրումը՝ շեշտելով՝ Հնդկաստանում պետք է հավաքագրման հատուկ կետեր լինեն՝ այդ մարդկանց Հայաստան ուղարկելու համար, նմանապես մեզ մոտ պետք է ընդունման կետեր լինեն։
Փաշինյանը, ի պատասխան պատգամավորի հարցադրման, նշեց՝ այս ամենը նշանակում է, որ Հայաստանում աշխատանք կա։ Այնպես չէ, որ բոլորն իրենց սրտի աշխատանքը կարող են գտնել, բայց, ըստ գործադիրի ղեկավարի, խոպան մեկնելն ինչ-որ առումով իներցիա է դարձել։
