Հարավային Կովկասում իրավիճակը կայունանում է. Շոյգու

Ռուսաստանի Անվտանգության խորհրդի քարտուղար Սերգեյ Շոյգուն հայտարարել է, որ Հարավային Կովկասում ընդհանուր իրավիճակը ցույց է տալիս կայունացման և բարելավման միտում։

«Ընդհանուր առմամբ, Հարավային Կովկասում իրավիճակը ցույց է տալիս բարելավման միտում։ Միևնույն ժամանակ, մենք կարևորում ենք, որ խաղաղ գործընթացը լինի տարածաշրջանային բնույթի։ Այդ առումով անհրաժեշտ է վերականգնել “3+3” ձևաչափի խորհրդատվական-տարածաշրջանային խմբի գործունեությունը»,- նշել է Շոյգուն Մոսկվայում կայացած ԱՊՀ անդամ երկրների Անվտանգության խորհուրդների քարտուղարների 13-րդ հանդիպման ժամանակ։

Շոյգուն ընդգծել է նաև տարածաշրջանում տրանսպորտային և հաղորդակցական կապերի ապաշրջափակման կարևորությունը՝ հիշեցնելով, որ այդ ուղղությամբ արդեն ձեռք են բերվել որոշ պայմանավորվածություններ եռակողմ աշխատանքային խմբի շրջանակում։