Կկրճատվեն «Զինապահ» վճարները՝ առողջապահական բեռը թեթևացնելու համար

Առողջապահական համընդհանուր ապահովագրության վճարների բեռը թեթևացնելու նպատակով նախատեսվում է «Զինապահ» հիմնադրամին ուղղվող գումարները կրճատել՝ վերադառնալով նախկին չափերին։ Այս մասին նոյեմբերի 5-ին հայտարարեց ՀՀ վարչապետ Նիկոլ Փաշինյանը՝ առողջապահության նախարար Անահիտ Ավանեսյանի հետ ուղիղ եթերում քննարկման ժամանակ։

Փաշինյանի խոսքով՝ 1000 դրամից մինչև 1 մլն դրամ եկամուտ ստացողների համար ներկայիս 5500 դրամի փոխարեն վճարումը կդառնա 1000 դրամ։

Բացի այդ, նախատեսվում է հայտարարագիր լրացրած անձանց առողջապահական ծախսերի փոխհատուցումը բարձրացնել՝ քաղաքացիներին ամսական մինչև 6000 դրամ վերադարձնելու ձևաչափով։

«Երբ քաղաքացին համընդհանուր առողջապահական ապահովագրության շրջանակում օգտվի որևէ բժշկական ծառայությունից, նրան SMS կուղարկվի՝ նշելով, թե որքան գումար է վճարվել այդ ծառայության համար»,– նշեց Փաշինյանը։

Նախարար Անահիտ Ավանեսյանը հավելեց, որ քաղաքացիների վերահսկողությունը կարևոր է համակարգի թափանցիկության համար։ «Քաղաքացին արդեն հավելվածում տեսնում է, թե իր անունով որ այցն է գրանցվել և ինչքան գումար է փոխանցվել պետպատվերով։ Այժմ հաղորդագրություն ուղարկելու մեխանիզմը կավելացնենք»,– ասաց նա։

Ավանեսյանի խոսքով՝ 200 000 դրամից բարձր եկամուտ ունեցող քաղաքացիները 2026 թվականից ամսական 10 800 դրամ կվճարեն առողջապահական ապահովագրության համար։ Բացի այդ, նախատեսվում է, որ ապահովագրության շրջանակներում տարեկան բժշկական ստուգումները կդառնան պարտադիր։

Հիշեցնենք, որ առողջապահության պարտադիր ապահովագրության օրենսդրական նախագիծը դեռ քննարկման փուլում է և պետք է ներկայացվի Ազգային ժողովի հաստատմանը։