Ուղևորատար գնացքը բախվել է կանգնած բեռնատարի. կան զոհեր և տուժածներ. Հնդկաստան
Հնդկաստանի Չհատիսգարհ նահանգում տեղի ունեցած ծանր երկաթուղային վթարի հետևանքով 11 մարդ է մահացել, իսկ շուրջ 20-ը տարբեր աստիճանի մարմնական վնասվածքներ են ստացել։
India Today-ի հաղորդմամբ՝ ողբերգությունը տեղի է ունեցել այն ժամանակ, երբ ուղևորատար գնացքը անցել է արգելող ազդանշանը և բախվել կանգնած բեռնատար գնացքի պոչին։ Բախման ուժգնությունը այնքան մեծ է եղել, որ մի քանի վագոն դուրս է եկել ռելսերից։
Դեպքի վայր են ժամանել փրկարարական խմբեր և բժշկական անձնակազմ։ Վիրավորներին տեղափոխել են մոտակա հիվանդանոցներ։ Նշվում է, որ զոհերի թիվը կարող է աճել՝ հաշվի առնելով նրանցից մի քանիսի ծանր վիճակը։
Պաշտոնական մարմինները սկսել են քննություն՝ պարզելու վթարի հանգամանքները և պատասխանատուների շրջանակը։
