Ռուսաստանում տասնյակ մարդիկ աչքերի այրվածքներ են ստացել կինոթատրոնում. հարուցվել է քրեական գործ
RT-ի տեղեկացմամբ՝ Ռուսաստանի Աբական քաղաքում տասնյակ մարդիկ, այդ թվում՝ երեխաներ, աչքերի այրվածքներ են ստացել կինոթատրոն այցելելուց հետո։ Տուժածների թիվը գերազանցում է 30-ը, որոնցից շուրջ 20-ը անչափահասներ են։
Կրասնոյարսկի երկրամասի քննչական կոմիտեն հայտնել է, որ ֆիլմի ցուցադրության ընթացքում աշխատել է մանրէասպան լամպ, ինչը դարձել է այցելուների աչքերի վնասման պատճառը։
Տուժածներին ցուցաբերվել է բժշկական օգնություն, և ըստ նախնական տվյալների՝ նրանց առողջական վիճակը ծանր չէ։
Դեպքի առթիվ հարուցվել է քրեական գործ, իսկ մարզային դատախազությունը սկսել է քննություն՝ պարզելու անվտանգության կանոնների խախտման հանգամանքները։
