ՏԵՍԱՆՅՈՒԹ․ Իսրայելցի զինվորները կիսամերկ վիճակում խոշտանգել են պաղեստինցի տղամարդկանց

Իսրայելցի զինծառայողների կողմից բռնվելուց հետո տասնյակ պաղեստինցիներ Գազայի հատվածի հյուսիսում մերկացվել են, կապկպվել ու ծնկի բերվել։ Համացանցում շարունակ կադրեր են տարածվում։

Կադրերում երևում է, որ Իսրայել պաշտպանության ուժերը տասնյակ տղամարդկանց տեղավորում են մեքենաների բեռնախցիկներում: Ենթադրաբար, պաղեստինցիներին շրջապատել են Ջաբալիայի փախստականների ճամբարում:

Հայտնի է, որ տղամարդկանց մերկացրել են, որպեսզի զենքի առկայության դեպքում, հայտնաբերեն այն: Բացի այդ, նրանց ոտաբոբիկ քայլացրել են Գազայի հրապարակով:

Իսրայելի պաշտպանության բանակի խոսնակ Դանիել Հագարին հաստատել է, որ տղամարդիկ գերի են ընկել։ Հագարին հավելել է, որ իսրայելական զորքերը Գազայում ձերբակալել և հարցաքննել են հարյուրավոր մարդկանց, որոնք կասկածվում են զինյալների հետ կապերի համար:

Նշենք, որ վերջինս չի պարզաբանել՝ նրանք ՀԱՄԱՍ-ի անդամնե՞ր են, թե՞ քաղաքացիական անձինք:

Հիշեցնենք ՝ ավելի վաղ հայտնել էինք, որ Իսրայելցի զինվորականները Գազա քաղաքում ձերբակալել են մի քանի տասնյակ տղամարդկանց՝ ՀԱՄԱՍ շարժման հետ նրանց կապերը ստուգելու համար։