Չարենացավանի բաժնում քաղաքացուն խոշտանգել են դեպքը փորձում են կոծկել․ փաստաբան․ ԶԼՄ

ՀՀ Ներքին գործերի նախարարության ոստիկանության Կոտայքի մարզային վարչության Չարենցավանի բաժնում քաղաքացուն 6 ամիս առաջ դաժան ծեծի են ենթարկել և այժմ գործը փորձում են կոծկել։ Այս մասին News.am-ի հետ զրույցում ասել է փաստաբան Սասուն Ռաֆաելյանը:
 

Նրա խոսքով՝ դեպքից մոտ 6 ամիս է անցել, սակայն մինչ օրս որևէ մեկը պատասխանատվության չի ենթարկվել, ոստիկանության ծառայողները շարունակում են պաշտոնավարել, իսկ իրենց մասնակցությամբ՝ բացի տուժողի հարցաքննությունից, որևէ այլ ապացուցողական, վարույթային գործողություն չի կատարվել։

«Հունվարի 12-ին Արման Խալապյանին հրավիրել են ՆԳՆ Կոտայքի մարզային վարչության Չարենցավանի բաժին՝ իբր իր որդու մասնակցությամբ տեղի ունեցած վիճաբանության կապակցությամբ պարզաբանումներ կատարելու: Արման Խալապյանն ընկերոջ հետ վերջինիս ավտոմեքենայով գնացել է Չարենցավանի բաժին, որտեղ նրան ընդունել են ՔՀԲ աշխատակիցները, հիմնավորել է, որ Արման Խալապյանի որդին որեւէ առնչություն չի ունեցել կատարված միջադեպին, ինչից հետո ՔՀԲ աշխատակիցները տեղեկացրել են, որ Արման Խալափյանին ուզում է տեսնել բաժնի ղեկավարը: Բարձրացել են բաժնի պետ Մհեր Մինասյանի աշխատասենյակ, որտեղ շուրջ 5 րոպե զրուցելուց հետո ներս են մտել ՆԳՆ աշխատակիցները, պետի ներկայությամբ Արման Խալապյանին խոշտանգել են, ապա ձերբակալել են եւ տեղափոխել ՀՀ ՔԿ»,- ներկայացրել է փաստաբանը:
 

Սասուն Ռաֆաելյանը պատմել է, որ Արման Խալապյանի նկատմամբ խափանման միջոց կալանքն ընտրելու համար նրան պադգարակով տարել են դատարան. «Դրանից հետո՝ հունվարի 13-ին, դատական նիստի ժամանակ մեղադրյալ Արման Խալապյանի ինքնազգացողությունը կտրուկ վատացել է, նրա մոտ ախտորոշվել է «փակ ողնաշարային վնասվածք, գոտկային 1-ին, 2-րդ եւ 3-րդ ողերի լայնագիծ ելունների գծային կոտրվածք աջից առանց տեղաշարժի»: Նույն օրն Արման Խալապյանի նկատմամբ որպես խափանման միջոց է ընտրվել կալանավորումը, նա դատական նիստին ներկայացվել է պադգարակի վրա պառկած վիճակում»: 
 

Փաստաբանը նշել է, որ վարույթն իրականացնող քննիչը Արման Խալապյանին հարցաքննել է դեպքից 3 ամիս անց, և, նրա խոսքով, իրավապահները այժմ ամեն ինչ անում են՝ գործը կոծկելու համար։

Մանրամասները՝ սկզբնաղբյուրում։