Վեդիում դեռահաս քույրերի գործով մեղադրվող տղամարդկանց կալանքը երկարաձգվել է ևս 2 ամսով

Վեդիում դեռահաս քույրերի նկատմամբ սեռական բռնություն կատարելու մեջ մեղադրվող տղամարդկանց կալանքը երկարաձգվել է ևս 2 ամսով։ Այս մասին NEWS.am-ին հայտնել է քույրերի փաստաբան Վարդուհի Էլբակյանը։

Փաստաբանի խոսքով՝ քրեական վարույթը նախաքննության ավարտական փուլում է։

Քննչական կոմիտեն ավելի վաղ հայտնել էր, որ փետրվարի 12-ին անչափահաս քույրերի հայրը հաղորդում է ներկայացրել՝ նշելով, որ Վ.Ե.-ն, օգտվելով իր դստեր անօգնական վիճակից, կատարել է անառակաբարո գործողություն։

Ապրիլի 22-ին, անչափահաս քույրերից մեկը  հաղորդում է ներկայացրել՝ նշելով, որ Արթուր անունով տղամարդն իրեն մեքենայով տարել է այլ վայր և սեռական հարաբերություն ունեցել իր հետ։

Քննչական կոմիտեն հայտնել էր, որ նախաքննության ընթացքում իրականացվել են մի շարք գործողություններ՝ նշանակվել է դատահոգեբուժական-դատահոգեբանական համալիր փորձաքննություն, հարցաքննվել են անչափահասների ընտանիքի անդամները, մանկավարժները և մատնանշված այլ անձինք։

Լրագրող Սյուզի Բադոյանի հրապարակումներից հետո իրավապահները, ըստ ավելի վաղ տարածված տեղեկությունների, ձերբակալել և ապա կալանավորել էին 58 և 65 տարեկան տղամարդկանց։