Զելենսկու և Պուտինի հնարավոր հանդիպումը կարող է անցկացվել Թուրքիայում

Ուկրաինայի ԱԳ նախարար Անդրեյ Սիբիհան հայտարարել է, որ Ուկրաինան պատրաստ է հրադադարի և նախագահներ Վլադիմիր Զելենսկու ու Վլադիմիր Պուտինի հնարավոր հանդիպումը կարող է անցկացվել Թուրքիայում։

Կիևում Թուրքիայի արտաքին գործերի նախարար Հաքան Ֆիդանի հետ համատեղ մամուլի ասուլիսի ժամանակ ուկրաինական կողմն անդրադարձել է ռուս-ուկրաինական պատերազմում Թուրքիայի միջնորդական դերակատարմանը։

Ուկրաինայի արտաքին քաղաքական գերատեսչության ղեկավարը նշել է, որ Ուկրաինան պատրաստ է հրադադարի և հավելել․ «Մենք հայտնում ենք, որ բանակցությունները, հատկապես՝ պարոն Վլադիմիր Զելենսկու և Վլադիմիր Պուտինի միջև հնարավոր հանդիպումը, կարող է կայանալ Թուրքիայում»։ Սիբիհայի ձևակերպմամբ՝ սոսկ առաջնորդների գագաթնաժողովը կարող է հաղորդել նոր դինամիկա խաղաղության գործընթացին։

Ֆիդանն իր հերթին վերահաստատել է Անկարայի պատրաստակամությունը՝ դարձյալ հյուրընկալելու կողմերին և ակտիվացնելու դիվանագիտական ջանքերը։ Նա մատնանշել է նախորդ ամիս Մոսկվա կատարած իր այցը, որտեղ նույնպես հայտնել է պատերազմը շուտափույթ ավարտելու վերաբերյալ թուրքական կողմի դիրքորոշումը։

Խոսելով տարածաշրջանային անվտանգության մասին՝ Ֆիդանը շեշտել է, որ հակամարտության ընդլայնման ռիսկը շարունակում է մնալ լուրջ սպառնալիք։ Բացի այդ, նշվել է, որ պաշտոնական Անկարան կտրականապես դեմ է պատերազմական գործողությունների տեղափոխմանը Սև ծովի տարածք։