Ուկրաինայի նախկին ՊՆ նախարարը պահանջում է ընտրություններ անցկացնել պատերազմի պայմաններում

Ուկրաինայի պաշտպանության նախկին նախարար Միխայիլ Ֆեոդորովը հայտարարել է պատերազմական պայմաններում ընտրություններ կազմակերպելու անհրաժեշտության մասին՝ սուր քննադատության ենթարկելով երկրի ներկայիս իշխանական համակարգը:

Երկրի ամենաժողովրդական քաղաքական գործիչներից մեկը համարվող Ֆեոդորովը ժողովրդին ուղղված դիմում է տարածել իր Յութուբյան ալիքով։ Նա նշել է, որ պատերազմի ևս մեկ, երկու կամ երեք տարի ձգձգվելու դեպքում Ռուսաստանը չպետք է ստանա որոշելու իրավունքը, թե երբ ուկրաինացիները կրկին կընտրեն իրենց իշխանությունը։ Ըստ նախկին նախարարի՝ ժողովրդավարությունը չի կարող դառնալ Ռուսաստանի պատանդը, քանի որ պայքարը ընթանում է հենց ազատ եվրոպական պետություն մնալու համար։ Նա ընդգծել է, որ անհրաժեշտ է գտնել օրինական, անվտանգ ու իրատեսական մեխանիզմ, որը թույլ կտա Ուկրաինային վերականգնել լիարժեք ժողովրդավարական գործընթացը նույնիսկ երկարատև պատերազմի ընթացքում։

Ուկրաինական իշխանությունները բազմիցս ընդգծել են, որ ռազմական դրության պայմաններում ընտրությունների անցկացումն անհնար է և ուղղակիորեն արգելված է օրենքով։ Նախագահ Վլադիմիր Զելենսկին հիշեցրել է, որ միլիոնավոր քաղաքացիներ ապաստանել են երկրի արևմուտքում և արտասահմանում, իսկ տարածքի մոտ 20 տոկոսը գտնվում է ռուսական օկուպացիայի տակ։

Միևնույն ժամանակ, Ուկրաինայում ընտրությունների անցկացումը Մոսկվայի առաջնային պահանջներից էր Դոնալդ Թրամփի գլխավորած ԱՄՆ նոր վարչակազմի հետ բանակցություններում։

Ֆեոդորովի հայտարարությունը հնչել է այն բանից հետո, երբ Զելենսկին պաշտոնապես դիմել է Գերագույն ռադային՝ Ուկրաինայի պաշտպանության նոր նախարար նշանակելու Եվգենի Խմարային, ով Ֆեոդորովի հրաժարականից հետո զբաղեցնում էր նախարարի պաշտոնակատարի տեղը։