Իրանից կոչով դիմել են մուսուլմանական երկրներին

Իրանի բանակի «Խաթամ ան-Անբիա» կենտրոնական շտաբի հրամանատար, գեներալ-մայոր Ալի Աբդոլլահին հայտարարել է, որ մուսուլմանական երկրներից պահանջվում է «հեռատեսություն» ցուցաբերել, հետևել Մերձավոր Արևելքում ԱՄՆ-ի քայլերին և վերանայել Վաշինգտոնի հետ իրենց համագործակցությունն ու փոխգործակցությունը:

Ըստ նրա՝ ԱՄՆ-ն «արագացնում է տարածաշրջանային հակամարտության լայնամասշտաբ էսկալացիայի կուրսը»՝ նպատակ ունենալով Մերձավոր Արևելքում հաստատել «ապօրինի տիրապետություն»: Աբդոլլահին Վաշինգտոնին մեղադրել է նրանում, որ Իրանի դեմ վերջին պատերազմի ընթացքում նա պատրաստ է եղել դիմել ցանկացած միջոցի՝ սեփական նպատակներին հասնելու համար:

Իրանցի գեներալը նշել է, որ տարածաշրջանի պետություններն ԱՄՆ-ին են տրամադրում իրենց ֆինանսական ռեսուրսները, ենթակառուցվածքները և ռազմավարական հնարավորությունները: Դրանք հետագայում որպես «վահան» են կիրառվում ամերիկյան զինված ուժերի համար՝ միաժամանակ ամրապնդելով Իսրայելի ռազմական ներուժը:

Աբդոլլահիի պնդմամբ՝ Իրանն իր զինված ուժերի և դաշնակիցների հետ միասին ապացուցել է, որ «տարածաշրջանում ուժերի հավասարակշռությունը փոխվել է»: Նա հայտարարում է, որ իր նպատակներին հասնելու ԱՄՆ-ի անկարողությունը ամերիկյան զորքերին ու Իսրայելին ստիպել է մարտական գործողություններն իրականացնել «մուսուլմանական երկրների տարածքից»՝ հակամարտության հետևանքները բարդելով տարածաշրջանի կառավարությունների ու հոսանքների վրա:

«Ցանկացած երկիր, որը պաշտպանական վահան կդառնա ԱՄՆ-ի համար, կայրվի պատերազմի կրակում», — հայտարարել է հրամանատարը։

Նա Մերձավոր Արևելքի պետություններին կոչ է արել ուշադիր հետևել Վաշինգտոնի գործողություններին և վերանայել ԱՄՆ-ի հետ համագործակցությունը: