Ռուսաստան–Ուկրաինա գիշերային զանգվածային հարվածների հետևանքով կան զոհեր

Ռուսաստանի և Ուկրաինայի միջև գիշերը տեղի են ունեցել փոխադարձ զանգվածային հարվածներ։ 

Հարվածների հետևանքով երկու կողմում էլ վնասվել են բնակելի շենքեր և քաղաքացիական ենթակառուցվածքներ, կան զոհեր ու վիրավորներ։

Ռուսաստանում Ուկրաինայի զինված ուժերը մի քանի հարյուր անօդաչու թռչող սարքերով հարձակվել են Կրասնոդարի երկրամասի վրա,  այս մասին հայտնում են Կրասնոդարի երկրամասի իշխանությունները:

Հարվածների հետևանքով Նովոռոսիյսկում զոհվել է 8-ամյա երեխա։ Եվս 8 մարդ վիրավորվել է, այդ թվում՝ մեկ երեխա։ 

Տեմրյուկի շրջանում ևս մեկ տղամարդ է զոհվել ստացած վնասվածքներից։

ԱԹՍ-ների բեկորներն ընկել են 21 բնակելի տան և 4 ձեռնարկության վրա։ Վնասվել են նաև տներ Անապայում և Գելենջիկում։

Միաժամանակ, Ռուսաստանը հարվածներ է հասցրել Ուկրաինայի 4 մարզերի՝ Զապորոժիեի, Պոլտավայի, Օդեսայի և Դնեպրոպետրովսկի ուղղությամբ։

Զապորոժիեում հարվածից հետո հրդեհ է բռնկվել «Էպիկենտր» առևտրի կենտրոնում, իսկ մոտ 1200 ընտանիք մնացել է առանց էլեկտրականության։

Պոլտավայի մարզում հրդեհվել է արդյունաբերական ձեռնարկություն, իսկ Օդեսայում վնասվել են ենթակառուցվածքային օբյեկտ և բնակելի տուն։

Դնեպրոպետրովսկի մարզում ռուսական ուժերը շուրջ 20 անգամ հարվածներ են հասցրել չորս շրջանների՝ կիրառելով անօդաչու սարքեր և հրթիռ։ Տուժել է 57-ամյա տղամարդ։

Վնասվել են հիվանդանոց, մշակութային-սպորտային համալիր, խանութներ, բազմաբնակարան և առանձնատներ։