Հրադադարից հետո իսրայելական ուժերը սպանել են ավելի քան 1200 պաղեստինցու․ ՄԱԿ

2025 թվականի հոկտեմբերին հրադադարի հաստատումից հետո Գազայի հատվածում և Հորդանան գետի Արևմտյան ափին իսրայելական ուժերի գործողությունների հետևանքով սպանվել է ավելի քան 1200 պաղեստինցի։ Այս մասին հայտնել են ՄԱԿ-ի մարդու իրավունքների փորձագետները։

Նրանց տվյալներով՝ միայն հուլիսին Գազայի հատվածում իսրայելական ուժերը սպանել են շուրջ 160 պաղեստինցու։

ՄԱԿ-ի փորձագետները հայտարարել են նաև պաղեստինյան քաղաքացիական բնակչության դեմ հարձակումների կտրուկ աճի մասին։ Նրանք դատապարտել են հիվանդանոցների և ապաստարանների ուղղությամբ հարվածները, ինչպես նաև ոստիկանների և ՄԱԿ-ի հետ պայմանագրով աշխատող անձնակազմի սպանությունները։

Փորձագետները նաև զգուշացրել են Գազայում պարենի շարունակվող պակասի մասին՝ նշելով, որ գյուղատնտեսական հողերի և մաքուր ջրի սահմանափակ հասանելիության, ինչպես նաև գյուղատնտեսության համար անհրաժեշտ ռեսուրսների մատակարարման խոչընդոտների պատճառով պաղեստինցիները զրկված են սեփական պարենային կարիքները բավարարելու հնարավորությունից։

ՄԱԿ-ի փորձագետները կոչ են արել անհապաղ դադարեցնել քաղաքացիական բնակչության դեմ հարձակումները, պահպանել հրադադարի ռեժիմը և ապահովել մարդասիրական օգնության անարգել հասանելիությունը։