Լավրովը հայտարարել է՝ Ռուսաստանը կաջակցի Երևանին և Բաքվին

ՌԴ արտգործնախարար Սերգեյ Լավրովը հայտարարել է, որ Ռուսաստանը շարունակում է աջակցել Հայաստանի և Ադրբեջանի հարաբերությունների համապարփակ կարգավորմանը և պատրաստ է աջակցել կողմերին տրանսպորտային ու տնտեսական հաղորդակցությունների ապաշրջափակման, ինչպես նաև հումանիտար հարցերի լուծման գործում։

Այս մասին Լավրովը հայտարարել է Մոսկվայում Ադրբեջանի արտգործնախարար Ջեյհուն Բայրամովի հետ հանդիպումից հետո։

Ասուլիսի ընթացքում Լավրովն անդրադարձել է նաև միջազգային օրակարգին, նա խոսել է ԱՄՆ  նախագահ Դոնալդ Թրամփի նախաձեռնությունների մասին։ 

Նրա խոսքով՝ Ռուսաստանն ընդունել է Ալյասկայում Թրամփի ներկայացրած առաջարկները, սակայն դրանց իրագործմանը խանգարում են եվրոպական երկրներն ու Ուկրաինայի նախագահ Վոլոդիմիր Զելենսկին:

ՌԴ արտգործնախարարը նաև հայտարարել է, որ Կիևը մտահոգված է, թե Պարսից ծոցում ստեղծված ճգնաժամի պատճառով ԱՄՆ-ի ուշադրությունը շեղվում է Ուկրաինայից։