Ո՞վ էր 2400 տարի առաջ թաղված տղամարդը․ Թուրքիայում արտասովոր դամբարան են բացել

Թուրքիայի հարավում գտնվող Ասպենդոսի մոտակայքում հնագետները հայտնաբերել են թաղում, որտեղ ամփոփված անձը, հնարավոր է, ավելի քան 2,4 հազար տարի առաջ եղել է պրոֆեսիոնալ ըմբիշ:

Քաղաքի սահմաններից դուրս գտնվող գերեզմանոցներից մեկում հայտնաբերվել է քարե սալերով կառուցված սարկոֆագ, որտեղ գտնվել են մնացորդները: Թուրքիայի մշակույթի և զբոսաշրջության նախարարության տվյալներով՝ թաղումը թվագրվում է մ.թ.ա. 475-300 թվականներով։

Մահացածի հնարավոր մարզական գործունեության մասին են վկայում դամբարանում գտնված արտեֆակտները, այդ թվում՝ ըմբիշների պատկերով արծաթե մետաղադրամները, թեև հնագետները դեռևս վերջնականապես չեն պնդում, որ նա իսկապես ըմբշամարտիկ է եղել։

Պեղումներին չմասնակցած Այովայի համալսարանի պատմաբան Սառա Բոնդի խոսքով՝ միայն մետաղադրամները բավարար չեն նման եզրակացության համար, քանի որ երկու ըմբիշների պատկերով արծաթե դրամները լայնորեն շրջանառվել են Ասպենդոսում և օգտագործվել ողջ բնակչության կողմից: Սպորտային անցյալը հաստատելու նպատակով անհրաժեշտ է անցկացնել աճյունների լրացուցիչ հետազոտություն, քանի որ ըմբշամարտով զբաղվելու մասին կարող են վկայել բնորոշ վնասվածքները, օրինակ՝ քթի կոտրվածքն ու դրա հետագա սերտաճումը:

Ասպենդոսը հունահռոմեական խոշոր քաղաք էր ժամանակակից Թուրքիայի հարավ-արևմուտքում, որտեղ ըմբշամարտն առանձնահատուկ տեղ ուներ, և քաղաքում հատվում էին երկու ըմբիշների պատկերով արծաթե մետաղադրամներ: Ավելի ուշ՝ մ.թ. II դարում, այնտեղ կառուցվել է շուրջ 8 հազար հանդիսական տեղավորող մարզադաշտ, որտեղ կազմակերպվում էին վազքի, նիզակի նետման մրցումներ և ըմբշամարտ։

Հայտնաբերված գերեզմանոցում պեղումների աշխատանքները շարունակվում են։