Ռուսաստանը Ուկրաինային հարվածել է ուրան պարունակող զինամթերքով

Ուկրաինայի անվտանգության ծառայությունը հայտարարել է, որ ռուսական զինուժը սկսել է կիրառել «Գերան-2» հարվածային անօդաչու թռչող սարքեր, որոնք, ըստ ուկրաինական կողմի, զինված են աղքատացված ուրան պարունակող ռազմամթերքով։

ՈւԱԾ-ի տվյալներով՝ նման տարրեր հայտնաբերվել են այն ԱԹՍ-ների բեկորների ուսումնասիրության ժամանակ, որոնցով Ռուսաստանը հարվածել է Չեռնիգովի մարզին 2026 թվականի ապրիլ-հունիս ամիսներին։

Ուկրաինայի արտակարգ իրավիճակների ծառայության մասնագետների հետ իրականացված ստուգումների ընթացքում, ըստ ՈւԱԾ-ի, որոշ բեկորների մոտ արձանագրվել է ճառագայթման բարձր մակարդակ՝ թույլատրելի նորմայից ավելի քան 80 անգամ։

Ուկրաինական կողմի պնդմամբ՝ ռուսական կողմը ԱԹՍ-ների վրա տեղադրել է ավիացիոն հրթիռների մարտական մասեր, որոնցում հայտնաբերվել են ուրան-235 և ուրան-238 տարրեր։

ՈւԱԾ-ն հայտարարել է, որ վտանգավոր բեկորներն արդեն վնասազերծվել են, իսկ դեպքի վայրերը մաքրվել և վերցվել են վերահսկողության տակ։

Այս հայտարարության հիման վրա Ուկրաինայում քրեական գործ է հարուցվել՝ պատերազմական հանցագործության հոդվածով։

Աղքատացված ուրանը բարձր խտությամբ նյութ է, որը հիմնականում օգտագործվում է զրահահար զինամթերքում։ Այն ավելի քիչ ռադիոակտիվ է, քան բնական ուրանը, սակայն կարող է վտանգ ներկայացնել, եթե այն վերածվում է փոշու և ներթափանցում մարդու օրգանիզմ։