Իրանի կորուստների վերաբերյալ թվեր են ներկայացվել

Իրանի Կարմիր մահիկի ղեկավարի խոսքով՝ հարվածներից տուժել են տասնյակ հազարավոր քաղաքացիական կառույցներ։

Իրանում, պաշտոնական տվյալներով, հարվածների հետևանքով վնասվել է 125 հազար 630 քաղաքացիական օբյեկտ։ Այդ մասին Թեհրանում հայտարարել է Իրանի Իսլամական Հանրապետության Կարմիր մահիկի ընկերության ղեկավար Փիր-Հոսեյն Քոլիվանդը, հաղորդում է IRNA-ն։

Քոլիվանդի խոսքով՝ վնասները գրանցվել են երկրի տարբեր շրջաններում։ Ըստ նրա ներկայացրած տվյալների՝ վնասված շինությունների զգալի մասը առևտրային և փոքր բիզնեսի օբյեկտներ են։

Նա նշել է, որ ընդհանուր վնասված շինություններից 23 հազար 500-ը առևտրի կենտրոններ, խանութներ և փոքր ձեռնարկատիրական գործունեության օբյեկտներ են։ Իրանական կողմը նշում է, որ պատերազմը մեծ ազդեցություն է ունեցել հազարավոր մարդկանց եկամտի աղբյուրների վրա։