Նեթանյահուն Լիբանանի հարցով նոր հանձնարարական է տվել

Իսրայելը չի դադարեցնի Լիբանանի տարածքում իրականացվող հարվածները, սակայն պատրաստ է նվազեցնել դրանց ինտենսիվությունը՝ հաշվի առնելով ԱՄՆ նախագահ Դոնալդ Թրամփի դիրքորոշումը, հաղորդում է The Wall Street Journal-ը՝ հղում անելով իր աղբյուրներին։

Ամերիկյան վարչակազմը դեռևս չի պահանջել Իսրայելից կրճատել «Հեզբոլլահ» խմբավորման դեմ գործողությունների ծավալը, սակայն մտահոգություն է հայտնում, որ շարունակվող հարվածները կարող են խոչընդոտել Իրանի հետ բանակցությունները և բարդացնել Հորմուզի նեղուցի վերաբացման ուղղությամբ տարվող ջանքերը։

Իսրայելի վարչապետ Բենիամին Նեթանյահուն հայտարարել է, որ հանձնարարել է հնարավորինս արագ սկսել ուղիղ բանակցություններ Լիբանանի հետ։ Axios պորտալի տվյալներով՝ հաջորդ շաբաթ հանդիպումներ են նախատեսվում անցկացնել Վաշինգտոնում:

Նշվում է, որ կողմերը կներկայանան ԱՄՆ-ում իրենց դեսպանների մակարդակով։ Իսրայելական Kan հեռարձակող ընկերությունը ևս հայտնել է, որ բանակցությունների կազմակերպումը պայմանավորված է ամերիկյան կողմի ճնշմամբ։