ԱՄՆ-ի աջակցությունը Ուկրաինային ԵՄ-ԱՄՆ սակագնային համաձայնագրի մաս է կազմել. Կոշտա

Եվրոպական խորհրդի նախագահ Անտոնիո Կոշտան առաջին անգամ բացահայտ հայտարարել է, որ ԱՄՆ-ի աջակցությունը Ուկրաինային ԵՄ-ԱՄՆ սակագնային համաձայնագրի մաս է կազմել: Այս համաձայնագրի շրջանակներում Եվրամիությունը համաձայնել է վճարել 15 տոկոս մաքսատուրք ԱՄՆ բոլոր արտահանումների համար՝ հրաժարվելով որևէ պատասխան միջոցառումից, հաղորդում է եվրոպական Politico հրատարակությունը:

Հրատարակությունը նշում է, որ սա «լուրջ շեղում է Եվրամիության պաշտոնական դիրքորոշումից», որը նախկինում պնդում էր, որ ԱՄՆ-ի դիրքորոշման և առևտրային համաձայնագրի միջև «կապ չկա»։ Politico-ն նշում է, որ Կոշտայի հայտարարությունը կարող է լինել «փորձնական հարված», որը ցույց է տալիս Բրյուսելի հանրային դժգոհությունը Վաշինգտոնի դիրքորոշման նկատմամբ։

Լրագրողները վերլուծել են Կոշտայի ելույթը Բլեդում (Սլովենիա) կայացած ռազմավարական ֆորումում, որտեղ Եվրոպական խորհրդի ղեկավարն ասել է. «Մենք, անշուշտ, գոհ չենք մաքսատուրքերի վերադարձից։ Սակայն լարվածության սրումը մաքսատուրքերի հարցում առանցքային դաշնակցի հետ, մինչդեռ (ԵՄ-ի և ՆԱՏՕ)-ի արևելյան սահմանը սպառնալիքի տակ է, կլինի անխոհեմ ռիսկ»։

Մեկնաբանելով մաքսատուրքերի համաձայնագիրը՝ Կոստան հավելել է. «Տրանսատլանտյան հարաբերությունների կայունացումը և ԱՄՆ-ի շարունակական ներգրավվածության ապահովումը Ուկրաինայի անվտանգության մեջ գերակա խնդիր էր»։

Այսպիսով, Politico-ն եզրակացնում է, որ «նախագահ Կոշտան, կարծես, ընդունեց, որ Ուկրաինան հիմնական գործոն էր ԵՄ-ի կողմից Միացյալ Նահանգների հետ խիստ քննադատված առևտրային համաձայնագրի համաձայնեցման գործում»։