ՏԵՍԱՆՅՈՒԹ. «Դաժանորեն պատժեք». Անդրանիկ Քոչարյան

«Որոշ պաշտոնյաներ կողային ապակիների մգեցվածությունը վերականգնել են և չեն պատժվել։ Ես կուզեի, որ Ոստիկանությունը հավասար պայմաններ ստեղծեր բոլորի համար։ Դաժանորեն պատժեք»,- բյուջետային քննարկման ժամանակ, դիմելով ՆԳՆ փոխնախարար Արփինե Սարգսյանին, ասաց ԱԺ «Պաշտպանության և անվտանգության հարցերի մշտական հանձնաժողովի» նախագահ Անդրանիկ Քոչարյանը։

ՀՀ բարձրաստիճան պաշտոնյաները, նրանց ուղեկցող մեքենաները մգացված ապակիներով երթևեկելու արտոնություն չունեն։ Հայաստանում դիվանագիտական և հյուպատոսական ներկայացուցչություններին պատկանող մեքենաները կարող են երթևեկել մգացված ապակիներով։ Տեղեկությունը հայտնում է ՀՀ ՆԳՆ մամուլի ծառայությունը:

«Նույն կանոնակարգի ենթակետերից մեկի համաձայն՝ տեխնիկական կանոնակարգի գործողությունը չի տարածվում դիվանագիտական և հյուպատոսական ներկայացուցչություններին, միջազգային (միջպետական) կազմակերպություններին (որոնք միջազգային իրավունքի համընդհանուր ճանաչում ունեցող սկզբունքներին և նորմերին համապատասխան օգտվում են արտոնություններից և անձեռնմխելիությունից), ինչպես նաև այդ ներկայացուցչությունների (կազմակերպությունների) աշխատակիցներին և նրանց ընտանիքների անդամներին պատկանող տրանսպորտային միջոցների վրա»,- նշված է հաղորդագրության մեջ:

Միաժամանակ ՆԳՆ-ից տեղեկացրել են, որ ՀՀ բարձրաստիճան պաշտոնյաները, նրանց ուղեկցող մեքենաներն այդպիսի արտոնություն չունեն։

Հիշեցնենք, որ ՀՀ-ում սահմանված չափը գերազանցող մգացված ապակիների համար տուգանելու որոշումն ուժի մեջ է մտել 2023 թվականի հունիսի 1-ից։ Թեև մգացված ապակիներով երթևեկելը շատ ավելի վաղուց էր արգելված ՀՀ օրենսդրությամբ, բայց տուգանքներ չէին կիրառվում, քանի որ ոստիկանությունը մգացվածության աստիճանը չափող սարքերով ապահովված չէր։

Ապակիների լուսաթափանցելիության թույլատրելի չափի համար հիմք է ընդունվել ԵԱՏՄ գործող ստանդարտը, այն է` տրանսպորտային միջոցների հողմապակու լուսաթափանցելիությունը պետք է լինի 75 տոկոսից ոչ պակաս, առջևի կողային ապակիներինը` 70 տոկոսից ոչ պակաս: