Իրանը Իսրայելին հնացած հրթիռներով է հարվածել․ ԻՀՊԿ

Իրանական կողմը Իսրայելին պատասխան հարվածի ժամանակ օգտագործել է միայն հնացած հրթիռային սպառազինություն: Նման հայտարարություն է արել Իսլամական հեղափոխության պահապանների կորպուսի (ԻՀՊԿ` Իրանի ԶՈւ–ի էլիտար ստորաբաժանումներ) օդատիեզերական ուժերի հրամանատար Ամիր Ալի Հաջիզադեն։ Տեղեկությունը փոխանցում է ՌԻԱ Նովոստին: 

«Մենք հարձակվել ենք Իսրայելի վրա՝ օգտագործելով հնացած զենք և նվազագույն միջոցներ։ Մենք չենք օգտագործել այնպիսի հրթիռներ, ինչպիսիք են «Խորեմշեհրը», «Սաջիլը», «Շահիդ Հաջ Քասեմը», «Հայբարշեկանը» կամ «Գերձայն-2»-ը։

Մենք Իսրայելին և արևմտյան ճամբարին ստիպեցինք առավելագույն սպառազինություն օգտագործել՝ մեր կողմից նվազագույն ջանքերի դեպքում»,- ասել է Հաջիզադեն: 

Հիշեցնենք` Իրանի ռազմաօդային ուժերի էլիտար ստորաբաժանումը` Իսլամական հեղափոխության պահապանների կորպուսը, ապրիլի 14-ի գիշերը հարված է հասցրել Իսրայելի տարածքին: Հարվածները հասցվել են ի պատասխան ամսվա սկզբին իսրայելական ավիացիայի կողմից Սիրիայում իրանական հյուպատոսության ոչնչացման: