Իսրայելը հարձակվել է Հարավային Լիբանանի վրա արգելված ֆոսֆորային ռումբերով: Այս ասին հայտնում է Pars Today Russian տելեգրամյան ալիքը: 

Ավելի վաղ Լիբանանի «Արևելք» հայկական թերթի Telegram ալիքը հայտնել էր, որ Իսրայելը ֆոսֆորային ռումբեր է արձակել Լիբանանի Խիամ քաղաքի վրա:

Միևնույն ժամանակ, ըստ Al Jazeera-ի, լիբանանյան «Հեզբոլլահ» խմբավորումը հայտարարել է, որ ավելի քան 60 հրթիռ է արձակել իսրայելական ռազմաբազայի ուղղությամբ՝ ի պատասխան Բեյրութում պաղեստինյան ՀԱՄԱՍ խմբավորման առաջնորդի տեղակալի սպանության:

Իսրայելական բանակը հաստատել է Իսրայելի հյուսիսային հատվածի ինտենսիվ գնդակոծության փաստը։ Զինվորականները հայտնել են, որ պատասխանել են՝ հարվածելով «ահաբեկչական բջջին», որը ներգրավված է եղել արձակման մեջ:

Զոհերի և ավերածությունների մասին տեղեկություններ չկան։