Ռուս բլոգերի կնոջ մահվան դեպքով ինքնասպանության հասցնելու հոդվածով քրեական գործ է հարուցվել
Հայտնի ռուս բլոգեր Ալեքսեյ Ռոմանովի կնոջ՝ Յանա Զելենսկայայի մահվան կապակցությամբ, ինքնասպանության հասցնելու հոդվածով քրեական գործ է հարուցվել։ Այս մասին Auroranews-ի հետ զրույցում հայտնեց ՀՀ քննչական կոմիտեի մամուլի քարտուղար Գոռ Աբրահամյանը։
«Կնոջ ինքնասպանություն գործելու վերաբերյալ ահազանգ ենք ստացել։ Դեպքի կապակցությամբ քրեական վարույթ է նախաձեռնվել ՀՀ քրեական օրենսգրքի 162–րդ հոդվածի առաջին մասի հատկանիշներով (սպառնալիքի, դաժան վերաբերմունքի կամ արժանապատվությունը նվաստացնելու եղանակով անձին անզգուշությամբ ինքնասպանության կամ ինքնասպանության փորձի հասցնելը)»,-ասաց նա։
Աբրահամյանի խոսքով` դեպքի վայրի զննություն է կատարվել։ Դիակի արտաքին զննությամբ բռնության հետքեր չեն հայտնաբերվել։
«Նշանակված է դատաբժշկական փորձաքննություն։ Վերջնական եզրահանգումներն, իհարկե, փորձաքննությունը կտա։ Այս պահին նախաքննությունը շարունակվում է»,-նշեց Աբրահամյանը։
Հիշեցնենք՝ հայտնել էինք, որ երեկ` սեպտեմբերի 14–ին, ժամը 21:30-ի սահմաններում Երևանի 1-03 շտապօգնությունից ոստիկանություն ահազանգ էր ստացվել, որ Տպագրիչների 6-րդ շենքի բնակարաններից մեկում հայտնաբերել է կնոջ դի: Հայտնի դարձավ, որ Երևանում մահացած հայտնաբերված կինը բլոգեր Ալեքսեյ Ռոմանովի կինն է։ Ալեքսեյ Ռոմանովը Խաբարովսկից է, նախկին հաղորդավար ու լրագրող:
